MERKEZÊ XEBERAN- PKK'yî netîceya kongreya xo ya 12. eşkera kerd. Kongre awanîya rêxistine ya PKK'yî de fesih kerd, têkoşînê çekdarî û karê bi nameyê PKK'yî yenê kerdiş, pêro peynî kerd. Kongre de şehadetê Alî Haydar Kaytan û Riza Altûn ame neqlkerdiş.

 

Dîwanê Kongreya PKK'yî ya 12. netîceya peynîya kongre eşkera kerd.

 

Beyanatê kongreyî wina yo:

 

“Proseso ke Rayber Abdullah Ocalanî bi eşkerayîya 27ê sibata 2025î de da destpêkerdene, bi xebatanê ke xeylê hetan ra ameyêne kerdene, binê roşnîya perspektîfî ke bi hewayanê cîya cîya pêşkêş kerdo, înan de ma Kongreya Partîya ma ya 12. mabênê tarîxanê 5-7ê gulane de kom bi û bi hewayêko serkewte qedîyaye.

 

Kongreya rixmê ma şero ke dewam kerdêne, hêrişê hewayî û bejayî yê ke dewam kerdêne, dorpêçkerdişê qadanê ma û ambargoyê PDK’yî de, bi hewayêko ewle ameye kerdene. Bi beşdarîya 232 delegeyan Kongreya PKK’yî ya 12. bi nîqaşkerdişê babetanê sey raybertî, Şehîd, Gazî, Estbîyayîşê Rêxistînî yê PKK’yî û Rêbaza Qedînayîşê Têkoşînê Çekdarî û Awankerdişê Komelê Demokratîkî seba Hereketê ma yê Azadîye qerarê tarîxî yê destpêkê qonaxêka newa îfade kenê.

 

Kongreya PKK’yî ya 12. ya Awarte îfade kerd ke têkoşînê PKK’yî sîyasetê înkar û îmhayî yo ke şarê ma ser o yo parçe kerd, meseleyê kurdî bi rayîrê sîyaseto demokratîk ard nuqteya çareserî, nê hetan ra PKK’yî mîsyonê xo yo tarîxî temam kerd. Bingeyê Kongreya PKK’yî ya 12. seba prosesê pratîkbîyayîşî hetê Rayber Apoyî ra bêro rayraberdene û ci rê kerdişê rayberîye qerarê fesihkerdişê rêxistine ya PKK’yî û qedînayîşê rêbaza têkoşînê çekdarî girewto û xebatê nameyê PKK’yî ser o rayra berdê, qedînayê.

 

Partîya ma PKK; vera sîyasetê înkar û îmhayî yê kurd ke çimeyê xo Peymana Lozane û Destûro Bingeyîn ê 1924î ra girewto, sey hereketê azadîye vejîyayo sehneyê tarîxî ser o. Wextê awanbîyayîşî de tesîrê sosyalîzmo caarde ciwîya û prensîbo ke netewe heqê xo yê qedera xo tayîn kenê, weçîna, bingeyê stratejîyê têkoşînê çekdarî têkoşînêko heqdar û rewa rayra berd. PKK şert û mercanê de ke înkarê kurd bi hewayêko hişk ameyêne kerdene sîyasetê îmhayî yo ke paştîya xo dano ci, polîtîkayê asîmîlasyon û qirkerdişî serwer bîyê, şekil girewt. Bi têkoşînê azadîye ke 1978î ra dayo destpêkerdene, no çî xo rê esas girewto; estbîyayîşê şarê kurdî bidê qebulkerdene û meseleyê kurdî sey realîteyo bingeyîn ê Tirkîyayî bêro vînayene. Nê bingeyî ser o encamê têkoşînî de bi hewayêko serkewte rayra berdo, nameyê şarê ma ser o caardişê şorişê vejînî bîyo sembolê gêrayîşê cuya bi rûmet û hêvîya azadîye ya şaranê herême.

 

Hetê şarê ma ra şorişê ma yê vejîne şert û mercanê serranê 1990î de vernîya averşîyayîşanê pîlan akerde û Serekkomarê Tirkîya Turgut Ozalî de gêrayîşê meseleyê kurdî bi rayîrê sîyasetê çareserkerdiş aver şi. Rayber Apo adirbestê 17ê Adara 1993î de cewab da nê gêrayîşî û prosesêko newe da destpêkerdene. Labelê tesîrê giran ê sosyalîzmo caardene, resayîşê çetewarî yê ke xeta ma ya şerî de ameyêne ferzkerdene û dewleta xorîne ke Turgut Ozal û ekîbê ey orte ra wedarna, encamê pîlkerdişê şer ê israrkerdişê sîyasetê înkar û îmhayî yê kurd de n proseso newe sabote bi. Bi hezaran dewî ameyê vengkerdene û veşnayene. Bi mîlyonan kurdî wareyê pî û bawkalanê xo ra ameyê koçberkerdene, bi des hezaran kesî îşkence ra vîyartê û ê eştê zindanan û bi hezaran zî bi hewo ke kiştoxê înan nêyenê zanayene, ameyê qetilkerdene. Eksê nê çîyî Hereketê Azadîye hem sey çendanî hem sey senînîye pîl bi, şerê gerîla Kurdîstan û Tirkîya de vila bi. Bi tesîrê şero ke gerîla kerd, şarê kurdî serewedarna. Bi nê hewayî her di hetan ra şer bi weçînitişo sereke. Tekraro ke şer hemverê yewbînan ame pîlkerdene, wina dewam nêkerd. Nê semedî ra hewldayîşê Rayber Apoyî yê bi rayîranê aştîyane û demokratîk çareserkerdişê meseleyê kurdî bêencam mendê.

 

Proses bi komployo mîyanneteweyî yê 15ê sibata 1999î ra bedilîya merhaleyêko cîya. Nê prosesî de hedefêko muhîm ê komployî şerê kurd û tirk bi, bi saya hewldayîş û fedakerîyanê pîl ê Rayber Apoyîno ame astengkerdene. Rixmo ke sîstemê qirkerdiş û îşkenceyî yê Îmraliyî de ameyêne girewtene zî, bi rayîranê aştîyane û demokratîk çaresekedişê meseleyê kurdî israrê xo domna. Rayber Apo ke nê 27 serrî yê binê tecrîdo teqez de yeno girewtene, bi têkoşînê xo yê vera sîstemê qirkerdişî yê Îmraliyî komployê mîyanneteweyî pûç kerd. Têkoşînê bi komployê mîyanneteweyî reyde analîza sîstemo îqtîdar-dewletdar ê serwerîya camêrdî, paradîgmaya komelkî ya demokratîk, ekolojîk, azadîwaştişê cinîyî aver berd. Bi nê hewayî seba şarê ma, cinî û merdimîya bindest sîstemê azadîye yê alternatîf şênber kerd.

 

Rayber Apo têkîlîyê kurd û tirk ê ke bîyê problem bi referans girewtişê verê Peymana Lozanî û Destûro Bingeyîn ê 1924î resayîşê Neteweya Demokratîk û perspektîfê Komara Tirkîya ya Demokratîke bi esasgirewtişê Welatê Hempar û şaranê kurd û tirk hêmanê awankerdox ê sey çarçewaya çareserîya meseleyê kurdî qebul keno. Serewedaritişê kurdî ê ke tarîxê komare de ameyê kerdene, dîyalektîkê têkîlîyanê kurd û tirk ê tarîxê hezar serrîn û têkoşînê 52 serran ê Raybertî nîşan dano ke meseleyê kurdî encax bi çareserkerdişê esasê Welato Hempar û Welatijanê Seypê do bido qezenckerdene. Çarçewaya Şerê Cîhanî yê 3. de averşîyayîşê rojane yê ke Rojhelato Mîyanên de qewimîyenê zî newe ra awankerdişê têkîlîyanê kurd û tirkî bibo nêbo ferz keno.

 

Şarê ma yo bi rûmet û xoverdayox ke nê 52 serrî yê vera polîtîkayanê asîmîlasyon û qirkerdişî, sîyasetê înkar û îmhayî, bi şertê dayîşê bedêlanê pîlan xo beşdarê rayîrşîyayîşê PKK’yî û Raybertîye kerdo, do bi hewayo serwext û rêxistinkerde wayîrê nê prosesê aştî û komelo demokratîk vejîyo. Ma şarê xo ra bawer kenê qerarê fesihkerdişê PKK’yî û qedînayîşê rêbazê têkoşînê çekdarî do her kesî ra başêr fam bikerê, bingeyê awankerdişê komelo demokrarîk do wezîfeyanê xo yê qonaxa têkoşînê demokratîkî rê wayîr vejîyê. Şarê ma do bi pêşengîya cinî û ciwanan, heme qadan de rêxistinbîyayîşê xo awan bikero, bi ziwananê xo, bi nasnameyanê xo û bi kulturanê xo xo rêxistin bikerê, vera hêrişan do bieşkê xo bipawê û bi ruhê seferberîyî awankerdişê komelê demokratîk û komunal ê heyatî bîyarê ca. Nê esasan ser o ma bawer kenî ke partîyê sîyasî yê kurdî, rîsipî û rêxistinê demokratîkî seba demokrasîya kurdî aver berê û netewbîyayîşê demokratîk ê kurdî bîyarî ca do berpirsîyarîyanê xo bîyarê ca.

 

Mîrasê tarîxê ma yo azadîye ke bi têkoşîn û xoverdayîşî derbas bîyo, bi qeraranê Kongreya PKK’yî ya 12. reyde, bi rêbazê sîyaseto demokratîk do hîna xurt aver şêro, ameyîşê şaranê ma do bingeyê azadîye û têduştî ser o aver şêro. Şarê ma yê hêjar û kedkarî, heme grûbê bawerîye, cinî û ciwanî, karkerd, dewij û beşê teberî îqtîdarî de mendê nê prosesî aştî û komelo demokratîkî de bi pawitişî heqanê xo derûdorêko adîl û demokratîkî de do cuya hempar aver berê.

 

Qerarê kongreya ma ya fesihkerdişê PKK’yî û qedînayîşî rêbazê têkoşînê çekdarî aştîyo mende û çareserîya demokratîkî rê zemînêko xurt pêşkêş keno. Caardişê qerarî ke babeta vatişî yê, hewce keno ke Rayber Apo prosesî aver bero û rayra bero, naskerdişê heqanê sîyaseto demokratîk û garantîya huqûqî ya saxleme ferx keno. Nê merheleyî de Meclîsê Mîlet a Pîle Tirkîya bi berpirpirsîyarîya tarîxî rolê xo yê pîle kay bikero muhîm o. Ma veng danê ke bi eynî rengî sere de hukmat û partîya sereke ya muxalefetî, partîyê sîyasî yê ke temsîlîyetê înan meclîsî de yeno kerdene, rêxistinê komelo sîvîl, civatê dîn û bawerîyan, sazîyê resnayîşî yê demokratîkî, rîsipî, roşnvîr, akademîsyen, hunermend, sendîkayê karker û kedkaran, rêxistinê cinî û ciwanan, hereketê ekolojîstî ganî bikewê binê berpirsîyarî û xo beşdarê prosesê aştî û komelo demokratîk bikerê.

 

Hêzê sosyalîst û çepgirî yê Tirkîya, temsîlkarê şorişgerî, rêxistin û şexsîyetî bi wayîrvejîyayîşê prosesê Aştî û Komelo Demokratîkî reyde têkoşînê şaran, cinîyan û bindestan do astêka newa bidest fîno. No do bêro vateyê servistişê amancê şorişgeranê pîlan ke vateyê înan ê peyênî ‘Biciwîyo Birayîya Şaranê Tirk û Kurd û Tirkîyeya Tam Xosere!’ bîyê.

 

Prosesê Aştî û Komelo Demokratîk û têkoşînê sosyalîzmî de ke Sosyalîzmê Komelo Demokratîk temsîlkarîya merheleyêko newe keno, averberdişê hereketê demokrasîyê global reyde do dinyayêka seypê û adil awan biba. Nê bingeyê ser o ma veng danî ke sere de dostê ma yê ke Gama Azadîya Globale rê pêşengîye kenê bi raya pêroyî ya demokratîke reyde çarçewaya teorîya modernîteya demokratîkî de piştgirîye pîle bikerê.

 

Hêzê mîyanneteweyî polîtîkayê qirkerdişî yê ke no se serrî yo vera şarê ma yenê rayraberdene, înan de berpirsîyarîya xo bivînî, çareserîya demokratîke rê mebê asteng û ma înan silaynenî ke piştgirîyêka awanker pêşkêşî prosesî bikerê.

 

Kongreya PKK’yî ya 12. ke bi vengdayîşê Raybertîya ma kom bi, şehadetê kadroyanê pêşeng ê Partîya ma Alî Haydar Kaytan (Fûat) ke 3ê Temmûza 2018î de û Riza Altûn ke 25ê Êlula 2019î de şehîd bîyê, îlan kerd. Nê bingeyê ser o kadroyanê pêşeng û awankerdoxanê PKK’yî ra yew Fûat – Alî Haydar Kaytan sey sembolê ‘Sozdarîya Raybertî, Heqîqet û Cuya Pîroze; hemrayanê destpêkê yê Rayber Apoyî hemray Riza Altûn zî sey sembolê ‘Hemrayîya Azadîye’ qebul kerd. Kongreya Partîyî ya 12. a tarîxî ma dîyarî her di şehîdanê pîlan kenî ke destpêkê Hereketê ma yo Azadîye de ca girewto û bi têkoşînê xo yo bêmabên ma rê pêşengtîye kerde. Şexsê înan de heme şehîdanê xo yê têkoşînî rê ma sozê xo yê serkewtişî tekrar kenê, ma îdiaya xo ya caardişê xeyalanê Şehîdê Aştî û Demokrasîyî Sirri Sureyya Onder dîyar kenê. Sosyalîzmê Neteweya Dewletdar Binvistişî Ano; Sosyalîzmê Komelê Demokratîk Resneno Serkewtişî. Merdimîye de Israr Sosyalîzmî de Israr o!

 

Biciwîyo Serok Apo!

 

12 Gulane 2025

Dîwanê Kongreya PKK’yî ya 12.”