Do meydanan de mesajê ‘Cuyêka bîne mumkin a’ bidê

  • 09:15 19 Teşrîna peyêne 2026
  • NAROJANE
Devrîm Findik
 
STENBOL - Rêxistinê cinîyanê ke xo semedê wareyanê 25ê teşrîna peyêne amade kenê, hemverê şîdetê dewlete-mêrdî bale antî ser muhîmîya pawitişê esasî û têkoşînê femînîst ê mîyanneteweyî û vatî: "Têkoşînê cinîyan esasê cimatê demokratîkî yo. Cinî azad nêbê cimatê demokratîkî awan nêbeno."
 
Ver bi 25ê teşrîna peyêne Roja Têkoşînê Hemverê Şîdetê Serê Cinîyan yê Mîyanneteweyî, cinîyê temsîlkarê Piştîdayîşê Morî, Meclîsê Cinîyanê Sosyalîstan (SKM), Meclîsê Cinîyanê HDKyî û Têgêrayîşê Cinîyanê Azadan (TJA) hemverê polîtîkayê şerê taybet, patrîarka, kapîtalîzmî vengê têkoşînê hembeşî ancî reyna kenê.
 
Rêxistinê cinîyan venga cinîyan danê ke 25ê teşrîna peyêne de bikewê wareyan.
 
'Hemverê kapîtalîzm û patrîarkayî xete munenê'
 
Endama Meclîsê Temsîlkarîya Piştîdayîşê Morî Yildiz Gezîcî va ke bi destê dewlete, patrîarka û kapîtalîzmî problemî yenê viraştiş û kuçeyan ra heta kargeyan mobîng û desteştiş esto. Yildiz Gezîcî wina va: "Nê problemê şexsî nîyê. Nê problemê ke bi destê dewlete, patrîarka û kapîtalîzmî yenê viraştişî yê. Problem tena şîdetê mêrde-dewlete yo, sermaye yo. Ver bi 25ê teşrîna peyêne ma hewl danê xeta femînîst sosyalîste awan bikerê."
 
'Ma 25ê teşrîna peyêne Taksîm Tunelî de yê'
 
Yildiz Gezîcî bale ant hêrîşê dibistananê Afyon, Riha û Mereşî ser, teqîyayîşê fabrîkeyê Dîlovasî û dewaya Aysel Aydemîre ya Îzmîrî û va: "Bi hemkarîya dewlete-sermayî cinî hedef yenê girewtiş. Têkoşînê cinîyan sînor derbaz kerdê. Ver bi 25ê teşrîna peyêne ma taxan de atolyeyê pawitişê esasî pê anê. Ma 21ê teşrîna peyêne de saet 18.30ine de Kadikoyî de yê û 25ê teşrîna peyêne zî Taksîm Tunelî de yê. Ma heme kesî uca rê dawet kenê."
 
'Qetilkerdişê cinîyan resa bîlançoyê şerî'
 
Verfeka Meclîsanê Cinîyanê Sosyalîst (SKM) Leyla Can va ke qetilkerdişê cinîyan resayo bîlançoyê şerî û wina ard ziwan: "Cinî asayîşê yewbînan ê. Îqtîdar bi polîtîkayê serra keyeyî cinîyan hepsê keyeyî keno. Hukm bi bêcezaverdayîşî gumanbaran xelat keno û cinîyê ke têkoşînê azadîye domnenê zî hedef gêno. Ma sey Meclîsê Cinîyanê Sosyalîstî emser bi sloganê 'Ma hemverê şîdetê mêrde-dewlete bi têkoşînê xo asayîş de yê' do wareyanê 25ê teşrîna peyêne de bê. Ma do Taksîm Tunelî de bêrê têhet û vengê xo berz bikerê."
 
'Têkoşînê esasê cimatê demokratîkî'
 
Endama Meclîsê Cinîyanê Kongreya Demokratîkê Şaran (HDK) Gurbet Aydogan va ke hemverê destkewtişê cinîyan hêrîşêk est o û wina ard ziwan: "Roje 5 cinî yenê qetilkerdiş. Nê demî de vengê ma sloganê 'Hemverê şîdetî pawitişê esasî, cimatê demokratîkî yo'. Prosesê Aştî û Cimatê Demokratîkî est o. Nê semedî ra têkoşînê cinîyan esasê cimatê demokratîkî yo. Ma venga heme cinîyan danê ke 25ê teşrîna peyêne de wareyan de pîya ca bigîrê."
 
Çalakîkera Têgêrayîşê Cinîyanê Azadan (TJA) Dîcle Asî zî qisey kerd û dîyar kerd ke ê do hemverê şîdetî kuçeyan de bê û 25ê teşrîna peyêne de vengê xo bi hawayêk hîna xurtêr berz bikerê.