RIHA - Aynzeliha Çetintaş, a ke Hewag de nêzdîbîyayîşê zimistanî dir engura rezê xo ra dims û bastêq berarde kena, va: "Ma nê dimso ke viraznenê tu qezenc bidest nêkenê, ma tena hewl danê ke kulturê xo tutanê xo rê neql bikerê."

 

Cinîyê ke Riha de amadekerdişê zimistanî dest pêkerdî û engurê ke rezê înan de yê, berardişê sey dims û bastêq viraznenê. Nê cinî ke eynî wextî de hewcedarîyanê xo yê zimistanî amade kenê, bi rayîrê berardişî beşdar benê budçeyê keyeyê xo zî û ruhê yewbîyayîşî geş kenê.

 

Aynzelîha Çetîntaş, a ke qezaya Hewagî ya Rihayî de engura rezê xo ra berardişanê sey dims û bastêq viraznena, qalê prosesê viraştişî kerd.

 

Dims senîn yeno viraştiş?

 

Aynzelîha Çetintaş dîyar kerd ke ê engure mîyanê rezî ra kom kenê û wina va: "Vizêrî ma şîyî mîyanê rezî û ma engure kom kerd. Ma verda ke engure heta siba bimano. Ma rew wuştî û engura xo pelçiqna û dest bi viraştişê şîre kerd. Semedê viraştişê dimsî, ma herrêka taybet a bi nameyê 'herra dimsî' kenê zereyê şîreyo ke engure ra ameyo vetiş. Dima ra ma şîreyê xo sefênenê û kenê mîyanê qazanêk pîlî. Wexto ke giryeno, ma vaşêk bi nameyê 'Vaşê Dimsî' kenê ci ke vernîya keldayîşî bigîro. Peynî de, ma dimsê xo serdin kenê û wedarnenê. Wina proses temam beno."

 

 

Aynzelîha Çetintaş, dîyar kerd ke ê nê adetî gane verdenê, dewam kerd û va: "Ma viraştişê şîreyî pir û kalanê xo ra musayî. Ma do hewl bidê ke no kultur bi hawayêk tewr baş bipawê. Dayîka mi û xesûya mi zî wina kerdêne. Wexto ke ez qij bîya, ma pîya şîyîne cayê pêşnayîşê rezî; demêk zaf weş û bi kêf bî. Verê, ma şîre o erdo ke ma engure uca kom kerdêne viraştêne. Ma bêmabêne mîyanê rayîrê rezî de şîyîne û ameyîne. Ma her wext çîyanê lazimî keye ra xo dir ardêne..."

 

 

'Tena karê ma no yo ke engure zîyan nêbo'

 

Aynzelîha Çetîntaş dîyar kerd ke her çiqas ma no dimso ke viraznenê qezencêk bidest nêkerê zî karê înan ê tewr pîl no yo ke vernîya vîndîbîyayîşê engure gênê û wina dewam kerd: "Ma hewl danê bi rotişê nê dimsî ke viraznenê qezencêk bidest bikerê. Ma serê sibayî rew dest bi xebate kenê û rastê zehmetîyanê pîlî yenê, la çi heyf ma berdêlê keda xo temamî bidest nêgînê; merdim eşkeno vajo ke hewldayîşê ma veng şino. Pêwa nê zî, ma hewl danê ke nê adetî bi hawayêk tewr baş tutanê xo rê biverdê. Mîsal, kênayêka mi est a ke temaşe kena û musena ka ma çi kenê û senîn kenê. Ma nê dimsî hem semedê ganekerdişê kultura xo û hem zî semedê ke vernîya vîndîbîyayîşê engure bigîrê viraznenê."