ŞIRNEX - Medîha Akay a ke Hezex de ciwîyena, bi meyve û sewzeyanê ke baxçeyê xo de resnena dest bi hazirîya zimistanî kerd. Medîha Akay dîyar kerd ke reyke zî têkilîya xo ya herre dir nêbirnaya û vat: “Herra ma nasname û ziwanê ma ya. Semedê ke ma kultur, ziwan û nasnameyê xo vînî nêkerê ma herre dir eleqedar benê.”

 

Bi amayîşê zimistanî dir cinîyan dest bi hazirîyanê zimistanî kerd. Medîha Akay a ke Hezexê Şirnexî de ciwîyena bi sewze û meyveyanê ke baxçeyê xo de ronayo dest bi hazirîyan kerd.

 

Medîha Akay dîyar kerd ke ê serranê 1990an de semedê veşnayîşê dewan dewa ra vejîyayî û vat pêwa nê çîyî dest herra xo ra veranêdayê. Medîha Akay derheqê hazirîyanê zimistanî de ajansê ma dir qisey kerd.

 

Hazirîyê zimistanî

 

Medîha Akay vat aşma êlule de girare pewtê û vat girare semedê werdanê cîyayan xebitnenê û wina ard ziwan: “Ma mewûjî viraştî. Ma îsot û balcan, bamye wuşk kerdî. Ma firingî wuşk kerdî. Ma do nika semedê şewdirî sos viraznê. Ma do tirşî viraznê. Verê ma dewa de dims viraştêne.”

 

Medîha Akay a ke dewa Gelîkur a Kerborana Mêrdînî ra ya, 1993'ine de birayê aye ame qetilkerdiş û wina vat: “1993'ine de qorîcîtî ma ser o ame ferzkerdiş. Tedayê dewlete zêde bîyî. Seba nê ma şewêk de dewa ra vejîyayî. Ma hazirîyê xo kerdîbî. Ma pêro keda xo verda û ma vejîyayî.”

 

Medîha Akay wina devamê qiseykerdişê xo kerd: “Verê dewa de ma her çîyî viraştêne, ma dims viraştêne. Ma goştê xo viraştêne. Firsatê ê demî sey nika nêbî. Dolaba qeşayî çinbî. Ma her çîyê xo wuşk kerdêne. Ma kewaran de nimitêne. Ma dewa xo verda û ma ameyî Hezex.”

 

Medîha Akay dîyar kerd ke Hezex de baxçeyê xo dir eleqedar bena û wina ard ziwan: “Ez nêeşkena bivinderî. Ganî ez meşgul bibî. Ez sewzeyanê sey firingî, bamye, îsotan ronena. Pêro hazirî dir eleqedar bena. Ez herre dir meşgul bena. Ma çîyê giranî derbas kerdî. Ez herre dir meşgul nebî nêeşkena bivinderî.”