Evîn Çîftçî

 

SEMSÛR – Bulamî de cinîyanê karkeran ê ramitişî ke verba keda xo nêgênê wina vatî: “Qezencê erdan kewt, kede zêde bîye. Ez nêxebitîya do 4 hezarî qîmê çîyêk bikero? Kiraya min a hîrê aşman kewta pê ser ma nêeşkenê bidê.”

 

Bajarokê Bulamî yê Çêlikana Semsûrî de bi seyine keyeyî şewdir ra wurzenê û dest bi karî kenê. Karkerî ke hema roje nêvejîyaya şinê erdan ser o û binê germî de heta nîmeroj xebitîyenê. Cinîyî ke hem erdan ser o hem zî keye de xebitîyenê keda înan nêna vînayîş.

 

Bulamî de cinîyanê ke erdan ser o kede danê zor û zehmetîyê mîyanê ekonomî de ciwîyenê behs kerdî.

 

Karê bêpeynî yê erdan ser o heta keyeyî

 

Dîlek Gunduzalp ke behsê zor û zehmetîyanê karê erdan ser o kerd dîyar kerd ke karê înan zehmet o û şewdir ra saete 05.00’an de dest bi karî kenê. Dîlek Gunduzalp wina ard ziwan: “Ma heta şanî xebate domnenê. Ma emser berarde çîyêk nêgirewt. Bi varayîşê torge dir tu berardiş ma nêgirewt. Hîrê serrî yo wina yo. Verê ma karkerî girewtêne nika ma nêeşkenê. Ma sey keyeyî xebitîyenê. Ez erdan ser o û dima zî keye de karê keyeyî kena.”

 

‘Berardeyê ma destê ma de mendî’

 

Rûşen Firat zî wina devam kerd: “Ma hende kede da. Torge dir keda ma şîye. Ma aşma nîsane ra heta nika mîyanê nê karî de yê. Serra vîyarte xirab bîye. Emser hîna zêde xirab a. Berardeyê ma yê serra vîyarte keye de yê. Qezencê erdan kewt, kede zêde bîye. Çi heyf teyna qezencê ma erdî yê û ma mecbûr ê bixebitîyê.”

 

‘4 hezarî do qîmê çîyêk bikero’

 

Şehrîban Bulut zî dîyar kerd ke rojaneyê înan qîmê çîyêk nêkenê û wina devam kerd: “Keyeyê mi çin o. Ez kira de ya. Ma hewl danê bi rojaneyan debar bikerê. Rojane hezar TL qezenc kena. Ez nêweş a. Ma bi nê perî nêeşkenê çîyêk bikerê. Dewlete di aşman ra reyke 4 hezarî dana mi. Mêrdeyê mi çin o. No qîmê çîyêk nêkeno.”