STENBOL – Hunermenda NÇM’î Fehîme Kaplan, derheqê xebatanê kultur û hunerî yê mewsimî neweyî de qisey kerd û dîyar kerd ke gureyê ke yenê kerdene teyna viraştişêko hunerî nîyê, eynî wext de çalakîyêka pawitişê cewherî yê. Fehîme Kaplane veng da cinî, ciwan û tutan ke tewrê atolyeyan bibê û wina vat: "Kultur û huner nîşaneyê ziwan, nasname û estbîyayîşê ma yê. Ma teyna çiqas wayîrê hunerê xo bivejîyê û ey bipawê, êşkenê biresê azadîye."

 

 Merkezê Kulturê Mezopotamya (NÇM) ke serra 1991ine ra hetanî nika Stenbol de bi armancê averberdiş û pawitişê kultur û hunerê kurdkî çalak o, mewsimê xo yê neweyî de bi eleqeyêko pîl ê şarî dest pêkeno. Merkez, xêrcê beşê sey sînema, muzîk, tîyatro û govende, perwerdeyê enstrumananê muzîkî û hunerê vengî zî pêşkêş keno; mîyanê nê enstrumanan de saz, tenbûr, piyano, keman, bilûr, hacetê pêrodayîşî, dengbêjî/vokal, dahol, erbane, zirne û gîtar est ê. Qeydî ke semedê mewsimê neweyî 1ê Êlule de dest pêkerdî, do heta aşma teşrîna verêne dewam bikerê.

 

 Hunermenda NÇM’yî Fehîme Kaplane derheqê plananê merkezî yê semedê mewsimê verênî de erjnayîş kerd.

 

Fehîme Kaplane ard ziwan ke NÇM serranê 1991î ra hetanî nika Stenbol de çalak o û xo semedê averberdiş û dewamkerdişê kulturê Kurdkî feda kerd o. Fehîme Kaplane bal ant serê xebatanê înan ê mîyanê wareyanê cîyayan de sey sînema, muzîk, tîyatro û govende û dîyar kerd ke ê bi coş û qerardarîyêk pîle resayî na sewîya. Fehime Kaplane, bi mojnayîşê nê çîyî ke no sazî mîyanê cimatî de veng dayo, wina vat: "Armancê ma no yo ke ma kultur û hunerê kurdkî aver berê û bipawê. Ma bi coşêko pîl û emegêko zaf resayî na sewîya. NÇM’yî tesîr serê cuya zaf merdiman ser o kerd. Ma hûmarêka zaf a muracatê cinî, ciwan û tutan ra girewtî. Serrê verênî zî paştdayîşêk pîl bîye; her kesî eleqeyêko pîl mojna kursan û nameyê xo qeyd kerd. No çî bi sebebê keyfweşîya ma. Ma verê cû vînenê ke emser zî tewrbîyayîş zaf bibo. Waştiş zaf xurt o. Emser zî berê ma semedê muracatê welatijan ê her beşê cimatî akerde yo."

 

 ‘Ma wareyê muzîkî de perwerdeyê tewir bi tewir danê’

 

 Fehime Kaplane, semedê antişê bala serê muhîmîya cimatî ya çalakîyanê kultur û hunerî, muhîmîya xebata xo ard ziwan û wina vat: "Kultur û huner ziwanê ma, nasnameyê ma û estbîyayîşê ma yê bingehîn ê." Fehîme Kaplane dîyar kerd ke nasnameyê ziwanê perwerdeyî ke ê semedê donemê verênî bernameyêk dewlemend amade kenê est o û wina vat: "Semedê ma, kultur û huner pawitişê cewherî yê; ê tarîxê ma, nasnameyê ma û estbîyayîşê ma yê. Ma semedê zaf tewiranê cîyayan ê muzîkî perwerde û dersan danê. Şewanê Dengbêjîye zî organîze kenê."

 

 ‘Ma do bi rayîrê kultur û hunerî cuyêka newe awan bikerê’

 

 Peynî de, Fehime Kaplane veng da ciwanan û wina vat: "Tenbûr teyna têlêk û parçeyêk darî nîyo. Kultur, huner û hacetê muzîkî temsîlê cuye kenê; wayîrê mana de xorî yê, ê ruh ê. Kultur û huner berê destpêkêk newe û cuya newe yê. Ma do pîya, bi rayîrê kultur û hunerî, cuyêka newe awan bikerê. Muracatî semedê atolyeyan, 1ê Êlule de dest pêkenê û do heta aşma teşrîna verêne dewam bikerê. Pêro Stenbol de merkezê ma ê ziwan, kultur û hunerî est ê; ma her caye bajarî de amade yê. Ez veng dana ciwan, tut û cinîyan ke semedê nê bernameyanê kultur û hunerî muracat bikerê û wayîrê erjanê xo bivejê.