Evîn Çîftçî

 

RIHA - Dadîya Muhammed Kendîrcîyî, yo ke bînê îşkenceyî de ame qetilkerdene, verê roniştişê dawaye ya ke do 23'yê Êlule de pê bêro, waştişê cezayanê giran û vernîgirewtişî semedê sûcdaran kerd û soz da ke a do têkoşîn bikero da ke verê mergê tutanê bînan bigîro.

 

Tutê ke Merkezê Perwerdeyê Meslegî (MESEM) de binê nameyê şagirdî û stajî de sey hêzê gureyî yo erzan û bêasayîş yenê xebitnayene, semedê şertanê gureyî yê bêasayîşî, rî bi rîyê merg û îhmalkarîyêka giran benê. Raporêko newe yo Merkezê Cigêrayîşî yo Konfederasyonê Sendîkayanê Şorişgêran ê Tirkîya (DİSK-AR) eşkera keno ke amara tutanê karkeran yê emrê 15-17 serran de panc serranê peyênan de se ra 69,6 zêde bîya. Na rewşe bi hawayêko zelal mojneno ke çînbîyayîşê tedbîranê vernîgirewtişî û kontrolanê rindîyan Tirkîya de, mergê tutan zêdeyêr keno.

 

Wendekarêko 15-serreyî yê MESEM'î Muhammed Kendîrcî qezaya Hewagî ya Riha de, 14ê Teşrîna Peyêne ya 2025ine de atolyeya xeratiyê ya ke tede xebitîyayîne de, rastê îşkenceyê Habip Aksoyî ame. Muhammed Kendîrcî berdi nêweşxane labelê 19ê Teşrîna Peyêne ya 2025ine de dinyaya xo bedelnaye. Habip Aksoy yo ke destpêk de dimayê destbendkerdişî çarçewa cipersayîşî de amebî verdayene, dima Dîlok de demo ke hewl dayêne welat ra biremo, ame tepiştene. Roniştişê dawayê munaqeşeya mergê Muhammed Kendîrcîyî, semedê 23yê Êlule Dadgeha Cezayê Giran a 10ine ya Riha de do bêro dîyene.

 

Dadîya Muhammed Kendîrcî Nebîhe Kendîrcî derheqê hedîse de qal kerd.

 

 

Nebîhe Kendîrcî bi îdîaya ke delîlê munaqeşeya hedîseyî nêweşxane de ameyî çinkerdiş, va: "Demo ma nêweşxane de bîyî, kincê lajê mi ameyî çinkerdiş. Min telefonê serdoktorê nêweşxaneyî kerd û va: 'Doktor, hedîseyêko wina nêweşxane de virazîya û kincê tutê mi vînî yê.' Ey mi rê va ke o do bêro nêweşxane û mi bivîno. Demo ke ame, mi pers kerd: 'Doktor, pantolone kamca de ya?' Ey bi asanî mi rê va: 'Eştê çop.' Gelo no nêweşxane de çimdarîyêke çin a? Gelo polîs yan zî cendirme uca de çîn ê? Dimayê hedîseyêk wina, senî şenê ê kincan bierzê çop? Saetêke dimayê eştişê înan, êdî çîyêk ê çopî de nêmendibî. Gelo meqsede a bîye ke o çop lezkî bêro çinkerdiş? Kincê tutê mi hîna zî vînî yê."

 

'MESEM tutan îstîsmar keno'

 

Nebîhe Kendîrcî, a ke nêwazena kes tutê xo bişirawo MESEM'î, wina ard ziwan: "O cayo ke o şîyo, ne kamera, ne asayîş, ne perwerde û ne zî çimdarîyêke est a. Yusuf Tekin, tutê mi kamca de yo? Mi tutê xo şirawit dibistane. Tutê mi karker nêbi; o uca de wendekar bi. Ez ne muhtacê ê hîrê yan zî panc hazar lîrayan ê ke dewlete dano ma ya. Labelê mecbûr bîya ke tutê xo bişirawî a dibistane; ma mecbûrê ey kerdê. Nika her kes agêreno cuya xo. Cayê gureyî hîna zî gure keno û bernameyê MESEM'î dewam keno. Demo ma wezîr Yusuf Tekinî ra pers kenê 'Nê hedîseyî qewimyayî; şima çi vanê?', ê îdîa kenê ke nêşenê MESEM'î semedê nê hedîseyan bigîrê. Min tutê xo emanetê ey kerd, tutê ke mi bi hawayêko zaf bi baldarî pawitêne û wayîrê ci vejîyayîne. MESEM'de, tutî semedê her tewir gureyî yenê şixulnayene."

 

'Ganî bêrê cezakerdene'

 

Nebîhe Kendîrcî bala ante serê hewcedarîya caardişê cezayanê rindîyan ke verê sûcanê bînan gênê semedê sûcdaran û va: “O kesê ke tutê mi kişt, nika zîndan de yo. Beno ke o 3, 5 yan zî 10 serran zîndan de bimano û dima serbest bêro verdayene, labelê tutê mi êdî qet nêagêreno. Eger cezayê rindî bivînê, ma mecbûr nêmendêne ke ma çîyanê wina biciwîyê. Semedê ke tutê mi dinyaya xo bedelnaye, ganî kiştox cezayê ke heq keno bigîro. Ez tena şena ewnîyî mesaj û qîseykerdişanê ke ma bi rayîrê telefonê ey kerdî bî. 10 aşmî derbas bîyî û ez hîna zî paweyê lajê xo ya. Roj û şewê ma êdî sey verê cû nîyê..Ez hewl dana ke bi hêz bimanî, labelê ez bi temamî rincan bîya û hêzê mi nêmendo.”

 

‘Ez o semedê Muhammedanê bînan têkoşîn bikî’

 

Nebîhe Kendîrcî, dîyar kerd ke a do têkoşîn bikero da ke “tu Muhammedê bînî nêmirê” û va: “Ez venga her kesî kena: Ez wazena şima paştdayîşê ma bikerê. Na hedîseyêk wina ya ke tesîr her kesî kena. Ewro dore amebî serê tutê mi; meşte beno ke dore bêro serê tutê şima zî. Ez wazena roja roniştişî her kesî kîşta xo de bivîna. Ez wazena edalet pê bêro. Ganî sîyaset û prosesê hukmî pîya nêrêtêmîyankerdiş. Ez wazena heme kesê ke nê hedîseyî de têkildar ê, bêrê eşkerakerdiş. Ez o têkoşîn bikî da ke tu Muhammedê bînî nêrê kiştiş.”