MERKEZÊ XEBERAN - Kombîyayîşo ke hetê Meclîsê Cinîyanê PYDyî hetê Çilaxayî de ame organîzekerdiş, ame vatiş qonaxê bîyaye de lazim o ke cinî rêxistinbîyayîşê xo xurt bikerê û hemverê problemê sîyasî xebatêk hembeşî bîyarê, eynî wextî de piştîdayîşê bi YPJyî dir bidomnê.

 

Meclîsê Cinîyanê Partîya Yewîya Demokratîkî (PYD) bi armancê ercnayîşê rewşa sîyasîya Sûrîye, meseleya entegrasyonî, rolê cinîyan prosesî de û astengîyanê vernîya beşdarîya înan ê sîyasî, kombîyayîşêk hîra semedê cinîyanê bajarê Çilaxayî organîze kerd.

 

Kombîyayîşî de pêwa endamanê Nuşteyê Cinîyanê PYDyî endamanê komunî, meclîsê bajarî, sazîyanê sivîlî amade bîyî.

 

Kombîyayîş bi deqeyêk rêzgirewtişî dest pêkerd. Dimayê îdarekarîya Meclîsê Cinîyanê PYDyî Horîya Şemdîn rewşa sîyasîya Sûrîye û Rojhelatê Mîyanênî erjnayîş kerd û bale ant prosesê entegrasyonî yê mîyanê QSDyî û hukmatê demkî.

 

Horiya Şemdîn dîyar kerd ke peymana 29ê çeleyî hêrîşan vernîya girewtî û vernîya qonaxêk neweyî yê dîyalog û aştîye akerd.

 

Horiya Şemdîn dîyar kerd ke hewcedarîya qonaxê bîyaye beşdarîya raştîn ê cinîyan est a ke bi ser kewo û aramî pê bêro.

 

Horiya Şemdîn dewamê qiseykerdişê xo de bale ant problemanê vernîya cinîyan û nê vatişanê xo zêde kerd: “Bi rayîrê vilakerdişê îdîayan ke pozîsyonê cinîyan sazîyan de peykewtî û ameyox de nîno naskerdiş, şerêk taybet cinîyan ser o yeno domnayîş. Armancê lawazkerdiş ê rolê înan û peygoşkerdişê destkerdişan o. Lazim o ke cinîyan goş nêdê nê îdîayan. Lazim o ke rêxistina xo xurt bikerê û xebata xo wareyê sîyasî, komelî û ekonomîkî de bidomnê û destkerdişê ke bidest kerdî bipawê.”

 

Horiya Şemdîn muhîmîya domnayîşê kampanyaya piştîdayîşê YPJyî va û dîyar kerd ke YPJyî misogerê bîyayîşê cinîyan o, lazim o ke statuyê ci wezaretê pawitişî de bêro qebûlkerdiş.

 

Beşdarî zî derheqê mesele de fikrê xo ardî ziwan.

 

Kombîyayîş bi berzkerdişê sloganê “Jin, Jiyan, Azadî” peynî bi.