MÊRDÎN- Dayîka Aştî Bahar Bîlge ya ke mêrde ci, di lajê ci û di tornê ci mîyanê têkoşînê azadîya Kurdîstanî de dinyaya xo bedilnabî, wefat kerd. Dayîka Bahar bi vatişê xo yê, “Ez dayîka Serekî û Kurdîstanî ya” vîrê şarî de menda.

 

Dayîka Aştî Bahar Bîlge ya 87 serrîya xo de şîye heqîya xo. A qezaya Mardînî Nisêbînî ra ya. Keyeyê xo reyde rîyê qedexeyê vejîyayîşê teberî yê serranê 2015-2016î ra mecbur mend ke koçê qezaya Mardînî Qoser bikera.

 

Mêrdeyê dayîka Bahar, Abdulkadîr Bîlge serra 1994î de Nisêbîn de hetê hîzbulkontrayî ra ame kiştiş. Lajê ci endamê PKK’yî Zeynel Abidîn Bîlge (Piling) zî serra 1996î de Çelêya qezaya Colemêrgî de dinyaya xo bedilnaye. Lajê ci yo pîl Ekrem Bîlge (Diyar Bagok) yo ke endamê YPG’yî bi, ey zî  serra 2014î de Kobanî de dinyaya xo bedilnaye. Lajê ci yo bîn Huseyîn Bîlge zî 30 serrî zindan de mend û serra 2021î de amebî veradayîş. Tornê dayîka Bahar, Mazlum Bîlge (Piling Bagok) û Abdulhalîm Demîr (Diyar Bagok) zî serra 2016î de Minbic de mîyanê şerî de dinyaya xo bedilnayî.

 

Dayîka Bahar rixmo ke çimê ci nêasayênî zî serra 2014î de bi rojan serê sînorê Kobanî de, çalakîya dewa Mehsertî ya Pirsûsî de seba Kobanî nobet girewtbi û uca de bîbî sembolê çalakî. Bahar Bîlge serra 2014î de pêvînayîşê de ke Ajansê Xeberan ê Dîcle (DÎHA) reyde kerdbi, wina vatbi: “Mêrdeyê mi û gedeyê mi mi ra girewtî û îşkenceyê giranî kerdî înan rê. Sûke mîyan de şeytanokan (hizbulkontrayî) da mêrdeyê mi ro û ey kişt. Dîma ra zî lajê min o qij Piling şehîd bi. Lajê mi Huseyîn zî ke unîversîte de wendêne, ey girewt û cezaya muebedî daye ci. 23 serrî yo zindan de yo. Lajê min o pîl Dîyar Bagok zî her hetê Kurdîstanî de şer kerd û di-hirê serrî bi ke Rojava de şer kerdêne. Aşmêk verê cû Kobanî de şehîd bi. Ez dayîka Serekî ya. Ez dayîka heme şervana a. Ez dayîka Kurdîstanî ya. 3 serrî yo çimê mi weş nêvînenê. Labelê rixmê nê çîyî zî mi waşt ke ez sînorê Kobanî ser o têkoşînê lajê xo bidomna.”

 

Cenazaya dayîka Bahar do Goristanê Hecaca yê Nisêbînî de bêro definkerdiş û tezîyeya aye zî do Keyeyê Tezîye yê Abdulkadîr Dundarî yê Qoserî de bêra ronayene.