AMED - MKG û DFGyî yadkerdişê Nesrîn Teke de gorê aye ser o vatî: “Ma do kesanê ke rayîrê rastîye ser o bîyî meşale û rayîrê ma roşin kerdî xo vîr ra nêkerê. Ma do rêça înan ser o têkoşîn bidomnê.”

 

Komeleya Rojnamegeranê Cinîyanê Mezopotamyayî (MKG) û Komeleya Rojnamegeranê Dîcle Firatî (DFG), semedê yadkerdişê 26ine serrgêra koça peyêne ya rojnamegere Nesrîn Teke, Goristanê Mardinkapi yê qezaya Sûrî ya Amedî de merasîmêk yadkerdişî organîze kerdî. Endamanê komeleyan û keyeyê Nesrîn Teke tewrê çalakîye bîyî; çalakîye de fotografê Nesrîn Teke ame berzkerdiş.

 

‘Ez o rêça Nesrîne ser o rayîr ra şêrî’

 

Dayîka Nesrîn Teke, Nezahat Tekeye dimayê rêzgirewtişê semedê kesanê ke têkoşînê azadîye de dinyaya xo bedelnayî, qisey kerd û va: “Çi 26 serrî derbas bibo, çi zî 126 serrî, ma do bêmabêne rêça înan ser o bê. Hêvîdar a ke êdî dayîkî mecbur nêmanê gorê tutanê xo ser lorîkan vajê. Bi hezaran dayîkî est ê ke heta gorê tutanê înan zî dîyar nîyo. Ez zaf bi şans a ke eşkena bêra gore aye ser û qisey bikerî. Wa tu dayîkî nêbermê û tu ciwanî nêrê kiştiş. Mi soz dabî Nesrîne. Mi aye ra vatibî: ‘Eke ti baş bê, ez do kovara Ozgur Halkî kuçe bi kuçe vila bikerî’, û aye zî vatibî: ‘Wina bixebite ke dayîkî nêbermê.’ Ez do heta peynîye sozê ke mi dabî aye bica bîyarî. Sozê bîn mi nêeşkayî pê bîyarî; aye mi rê vatibî: ‘Ti do nêbermê.’ Erê, merasîmê cenazeya aye de ez nêbermaya; ez bi hêz menda. Wexto ke mi o soz da, mi nêzanayîne ke caardişê ci do çiqas zehmet bibo yan zî dejêk vîndîkerdişê tutêk do çiqas giran bibo. Heta ke ez sax bî, ez do rêça Nesrîne ser o bî û sozê xo pê bîyarî. Hêvîdar a ke vengê dayîkan bireso selahîyetdaran û ê kûrayîyê dejê ke dayîkî ancenê fehm bikerê.”

 

‘Ma xo vîr ra nêkenê’

 

Dima ra Medîne Olçen nameyê MKGyî ser o qisey kerd û va: “Ma şehîda xo bi rêzdarî anê vîr. Ma kesanê ke bîyî meşale û rayîrê ma roşin kerdî xo vîr ra nêkenê. Ma rojnamegeranê cinîyanê heta peynîye pêwa heme zordarî û zehmetîyan zî bi qelema xo rêça înan ser o bê. Ma do bibê taqîbkerê rastîya kesanê ke bi keda xo nê rayîrî de dinyaya xo bedelnayî.”

 

Yadkerdiş bi sloganan peynî bi.