Gulîstan Gulmuş

 

SEMSÛR - Hemsereka DBPyî ya Semsûrî Suzan Şen derheqê prosesê Aştî û Cimatê Demokratîkî û xebatanê komunî ser o ercnayîş kerd û wina va: “Ma nêeşkenê Semsûrî sey meselayêka îmarî biewnîyê. Semedo ke uca ancî xo ser bêro, bi şar û cimat awan bibo, no destê ma de yo.”

 

Yew bajaro ke tewr zaf erdlerzê Mereşî ra  tesîr bi Semsûr bi. Pêwa ke wina demêk vîyart, rêça erdlerzî hema cayê xo pawena. Bi hezaran kesî koç kerdî, bajar de feqîrî giranêr bîya û problemê roniştişî, komelbîyayîşê cinîyan zaf ê. Sewbîna vilabîyayîşê tîryakî mîyanê ciwanan roje bi roje zêde beno. Heto bîn ra bi vengê “Aştî û Cimatê Demokratîkî” yê Rayberê Şarê Kurdî dir îmkanê ke yenê viraştiş yenê munaqeşekerdiş. Na çarçewa de Semsûr de bi taybetî komunê cinîyan, taxî û wareyê cuye de yenê hedefgirewtiş ke cuyêka rêxistinbîyayîşê neweyî bikewê cuye û sewbîna awankerdişî yê cimatî yeno hedefgirewtiş.

 

Hemsereka Partîya Herêmanê Demokratîkî (DBP) ya Semsûrî Suzan Şen derheqê prosesê dimayê erdlerzî qisey kerd.

 

‘Semsûr de potansîyelêk hîra est o’

 

Suzan Şen eşkera kerd ke dimayê erdlerzî Semsûr zaf tesîr bîyo û va: “Ma nêeşkenê Semsûrî rê sey meselayêk îmarî biewnîyê. Ne fîzîkî, awankerdişêk komelî vernîya ma de yo. Nê hetî de Semsûr de potansiyelêk cidî û hîra est o. Vetişê ci zî destê ma de yo. Semedê ke uca ancî bêro xo ser destê ma de yo. Bêguman lazim o ke ma her demî ra zêde têkoşîn bikerê û hemkarîye bikerê.”

 

Komunêka cinîyan senîn esas yena girewtiş?

 

Suzan Şen bale ant komunbîyayîşê ke bajar de dewam keno û na mesele de zî wina va: “Ma do komunan sey modelê komelî bidê orte. Mîsal ma komunêka cinîyan senîn esas gênê? Ma senîn eşkenê bidê roniştiş? Komunanê cinîyan tena cayê ke cinî yenê têhet nîyê. Mîsal cinî komunan de şîdet qal kenê, la tena bi nê nêmanê. Metodanê têkoşînî yê hemverê şîdetî munaqeşe kenê. Hemverê nê senîn lazim o ke tibigêrê qerar gênê. Cinî tîya de benê kerdoxê sîyasetî. Komunî hîn zî dibistanê sîyasetî yê. Mîsal feqîrî qal kenê. Yewîneyê berardişê kolektîf munaqeşe kenê, piştîdayîş munaqeşe kenê û pîya berardiş kenê.”

 

‘Şarê Semsûrî semedê aştîye amade yo’

 

Suzan Şen wina qedêna: “Yew armancê ma yo tewr pîl herêmekerdişê sîyasetî yo. Komunî bingehê şarê kurdî de est ê. Şar pabeyê ma yo. Ma no vînenê, hîs kenê. Lazim o ke ma şêrê. Lazim o ke ma şêrê uca û komunanê xo qal bikerê. Vetişê cuya bi pîya zehmet nîyo. Şarê Semsûrî semedê aştîye amade yo. Lazim o ke dewlete zî game bierzo û qanûnan amade bikero. Semsûr amade yo ke aştî pêşwazî bikero.”