MERKEZÊ XEBERAN - Cinîyan semedê mitîngo ke do Amed de pê bêro veng dayî û vatî: “Bêrê ma bi pîya azadîya fîzîkî ya Rayberê Şarê Kurdî Abdullah Ocalanî biqîrê.”

 

Bi waştişê azadîya fîzîkî ya Rayberê Şarê Kurdî Abdullah Ocalanî peynîya hewteyî do Amed, Wan, Mersîn û Stenbol de bi sloganê “Bi serkêşîya azade ver bi cimatê demokratîkî” mitîngî bêrê organîzekerdiş. Bajaran ra do tewrbîyayîş semedê mitîngî pê bêro.

 

Amed de 28ê hezîrane de saete 17.00ine de Meydanê Îstasyonî de do mitîng pê bêro. Hemsereka Partîya Herêmanê Demokratîkî (DBP) Çîgdem Kiliçgun Uçar, Sekreterya Îmralîyî ra Veysî Aktaş do tewrê mitîngê Amedî bibê. Hunermendan ra zî Pinar Aydinlar, Kadîr Çat û Serhedo do bikewê sehne ser.

 

Amed, Riha û Êlihî ra venga tewrbîyayîşê mitîngî.

 

Amed

 

Hemsereka DBPyî ya Amedî Ruçem Vefa Elyakut va ke mitîng bi serkêşîya cinîyan pê yeno û va: “Birêz Abdullah Ocalan pêvînayîşanê bi keye, heyetî de vano cinî serkêşê prosesî yê. Ma cinî zanê ke prosesêk ke cinî serkêşê cê nêbê nêreseno armancê xo û rast bi netîce nêbeno. Ma bi nê armancî xebatanê xo domnenê.”

 

‘Ma vengê aştîye berz bikerê’

 

Ruçem Vefa Elyakut peynîya qiseykerdişê xo de va ke do mitîng de waştişê azadîya fîzîkî ya Rayberê Şarê Kurdî Abdullah Ocalanî biqîrê û wina dewam kerd: “Rayberê Şarê Kurdî pêvînayîşan de vano ‘azadîya mi vernîya azadîya şarê mi de nîya. Ê azad bibê ez zî azad a.’ Kurdî zî vanê eke serek azad nêbo ê azad nîyê. Bêrê ma pîya aştî biwazê û vengê xo berz bikerê.”

 

 

 

Riha

 

Hemsereka Komeleya Piştîdayîş û Hetkarîya Keyeyê Tepişteyan dir (TUAY-DER) Ayla Ozdemîr zî va ke do azadîya Rayberê Şarê Kurdî Abdullah Ocalan û tepişteyanê sîyasî biwazê û va: “Ma wazenê statuyê Birêz Ocalan pê bêro. Ma do nê semedî ra meydan de bê. Ma venga tewrbîyayîşî şarê xo rê kenê.”

 

Hemsereka Komeleya Yewîya Hetkarîye, Kultur û Yewîye ya bi Keyeyê Kesanê Merdimê Xo Bêşingê Şaristanîye de Vîndî kerdî (MEBYA-DER) ya Rihayî Makbule Yavuzel zî wina ard ziwan: “Wa tu kes nêro kiştiş. Wa no proses êdî bi netîce bibo. Wa gamî bêrê eştiş. Wa serekê ma azad bibo. Lazim o ke ma heme mitîngî de cayê xo bigîrê.”

 

Meryem Akin a ke xebatan de ca gêna zî venga tewrbîyayîşê mitîngî heme kesî rê kerd.

 

Sidika Denîz zî va ke lazim o ke Rayberê Şarê Kurdî Abdullah Ocalan û heme tepişteyî bêrê veradayîş û heme şarê Rihayî dawetê Amedî kerd.

 

 

 

Êlih

 

Çalakîkera TJAyî Ezel Aydin zî derheqê prosesî de qisey kerd û va ke semedê serkewtişê prosesî lazim o ke îqtîdar gamanê somutî bierzo û va: “Lazim o ke lezkî zemînê şert û mercê ke Abdullah Ocalan eşkeno bi hawayêk azad bixebitîyo bêro awankerdiş. Lazim o ke vernîya çareserîya demokratîkî bêro akerdiş û azadîya fîzîkî pê bêro. Ma nê esasî de veng danê heme kesî ke mîtîngê Amedî de ca bigîrê.”