AMED - Vejîya orte ke raporê otopsîyê Rojwelat Kizmaze ya ke biguman dinyaya xo bedelnaye, nimûneyê neynukî de sewîyeya kêmî de DNAyê camêrdêk ame tespîtkerdiş.

 

Rojwelat Kizmaz Elih de 9ê sibata 2024ine de vînî bî û cenazeya aye Awbendê Gola Ilisuyî de ameybî vînayîş. Dosyaya derheqê merdişê biguman ê Rojwelat Kizmaze bi qerarê “cay cipersayîşî çin o” ameybî girewtiş. Persê bigumanî yê derheqê merdişê biguman ê Rojwelat Kizmaze bi serran cewabê xo nêgirewt.

 

Cipersayîşê ke DNAya kamî yo nêame kerdiş

 

Dosyaya Rojwelat Kizmaze ancî ameye cipersayîş û ma xo resna raporê otopsî. Rapor de îbareyê “Sewîyeya kêmî de profîlê DNA Y-STR nimûneyê neynukî de ame tespîtkerdiş” est o û vejîya orte ke nêameyo cipersayîş ke DNAyê camêrdî ayîdê kamî yo.

 

Demê merdişî çin o

 

Raporo ke ame amadekerdiş de dayeyêk ke derheqê demê merdişê Rojwelat Kizmaze de ca bigîro çin o. Wexto ke merdim ewnîyeno raporê otopsî ra vîneno ke persê bigumanî nêameyê cewabdayîş û pêwa nê dozgerî serê dosya girewte.