ŞIRNEX - DBP’yî veng da tewrê Mîtîngê Azadîye ke do Amed de bêro organîzekerdiş bibê û va: "Cewabo tewr xurt, vera şerî yewbîyayîşê ma û pirrkerdişê meydanan o."

 

28ê Hezîrane de Meydanê Îstasyonî yê Amedî de bi sloganê “Bi Rayberê azad ver bi cimatê demokratîkî” seba azadîya fîzîkî ya Rayberê Şarê Kurdî Abdullah Ocalanî mîtîngêk yeno organîzekerdiş. Yeno pawitiş ke bajaranê dormeyî ra tewrbîyayîşêko pîl bibo.

 

Partîya Herêmanê Demokratîkan (DBP) qezaya Cizîrî ya Şirnexî de eşkerayîye da û raya pêroyî dawetê mîtîngê Amedî kerd. Hemsereka DBP’yî ya qezaya Cizîrî Filîz Acu dîyar kerd ke ma do mîtîng de waştîşê xo yê seba azadî û vurnayîşêko demokratîk reyna 

 

bikerê.

 

‘Cewabê şerî pirrkerdişê wareyan o’

 

Filîz Acu dîyar kerd ke şer, pêrodayîş û krîzê cimatî dinya de her ke şinê hîra benê û wina va: “Nê hîrê serranê peyênan de, Rayber Abdullah Ocalanî Prosesê Aşitî û Cimatê Demokratîkî da destpêkerdene û Têgêrayîşê Azadîye gamê muhîmî eştî. Wext ameyo ke hukmatê Tirkîya zî gamanê huqûqî û verbiçim bierzo. Seba cewabdayîşê nê çîyî, berzkerdişê waştîşê aşitî û azadîye û mojnayîşê îradeyê xo, ma do 28ê Hezîrane de Amed de seba mîtîngêko pîl ê azadîye bêrê têhet. Mîtîngê 28ê Hezîrane waştişê azadîya Rayber Abdullah Ocalanî û vurnayîşêko sîyasî û demokratîkî yo. Rayîrê aşitîyêka bi rûmet tîya ra derbas beno. Cewabo tewr xurt ê vera şer û zilmî, yewbîyayîşê ma û pirrkerdişê wareyan o.”

 

Eşkerayîye bi çepikan qedîya.