STENBOL - Dayîkê/Merdimê Şemeyî hewteyê 1108ine de aqubetê Mûrat Aslanî yo ke 32 serrê verî 10ê hezîrana 1994ine de amebi destbendkerdiş û dima ra amebi kiştiş persayî û vatî: “Yê ke Mûratî vîndî kerdî nêameyî muhakemekerdiş.”

 

Dayîkê/Merdimê Şemeyî bi waştişê “Wa vîndîbîyayeyî bêrê vînayîş, qetilkerî bêrê muhakemekerdiş” hewteyê 1108ine de Meydanê Galatasarayî yê Stenbolî de çalakîya xo ya hewteyîne organîze kerdî. Dayîkê/Merdimê Şemeyî, endamî û îdarekarê ÎHDyî yê Stenbolî û zafê pawitoxê heqê merdiman tewrê çalakîye bîyî. Çalakîye de fotografê vînîbîyayeyan ameyî berzkerdiş. Hewteyê 1108ine de aqubetê Mûrat Aslanî yo ke 32 serrê verî amebi vînîkerdiş ame perskerdiş.

 

Metnê eşkerayîye yê tirkî Hemsereka Pêroyî ya ÎHDyî Oya Ersoy wend.

 

Oya Ersoy dîyar kerd ke ê hewteyê 1108ine de vernîya bariyeranê polîsî yê ke înan Meydanê Galatasarayî ra cîya keno yê û wina qisey kerd: “Ma ancî vanê ke dewayê kesanê ke ameyî vînîkerdiş de bi sîstemê huqûqî yê bîyaye nîno çareserkerdiş. Çimkî zincîra bêcezaverdayîşî sîstemê edaletî merîyet ra vet. Ma hewteyê 1108ine de rewşa Mûrat Aslanî yo ke 32 serrê verî amebi remnayîş persenê. Mûrat Aslan 25 serrîya xo de, 10ê hezîrana 1994ine de qezaya Yenîşehîrî ya Amedî de ame remnayîş. Goreyê çimeyan Mûrat hetê kesanê ke xo sey polîsî nasnayî ra ame remnayîş. Keyeyê Mûratî muracatê heme sazîyanê fermîyan rê kerd la remnayîşê ci ame înkarkerdiş.”

 

Oya Ersoy dîyar kerd ke dimayê 10 serran bi îtirafanê endamê JÎTEMyî Abdulkadîr Ayganî rastî vejîya orte û va: “Fermandarîya JÎTEMyî ya Silopîya de îşkence Mûrat Aslanî ser o kenê, dima ra zî Mûrat Aslan benê Lice û uca yeno kiştiş û nimitiş. 19ê nîsana serra 2004ine de goreyê îtirafanê Abdulkadîr Ayganî cenazeya Mûrat Aslanî ameya vînayîş. Keye semedê 30 kesan gerre kerd la pêwa heme delîlan zî kerdoxî nêameyî muhakemekerdiş. Kesanê ke Mûratî vîndî kerdî nêameyî vernîya edaletî. Hewteyê 1108ine de ma veng danê ke dewaya Mûrat Aslanî bi hawayêk rind bêro domnayîş. Semedê Mûratî wa edalet bêro caardiş. Çend serrî derbas beno wa bibo ma do her wext aqubetê kesanê ameyî vînîkerdiş bipersê.”

 

Çalakî bi ronayîşê qerenfîlanê Meydanê Galatasarayî peynî bî.