AMED - Hemşaredara Çinarî Semra Akyuz bale ant polîtîkayanê dardekerdişî, asîmîlasyon û polîtîkayanê zextî yê serê şarê kurdî û va ganî binpaykerdişê heqan ê Îranî de nêvînaye nêrê vînayîş. Semra Akyuze va ke seba cuyêka azad û têduştî ganî şert û mercê aştî û muzakereyî bêrê awankerdiş.

 

Îran de polîtîkayê dardekerdişî yê serê kurdan her ke şonê giran benê. Nê caardişê ke şarê kurdî hedef gênê, roj bi roje yenê meşrûkerdiş û heqê merdiman bi hawayêko cidî yeno astengkerdiş.

 

Hemşaredara Çinarî Semra Akyuz derheqê babete de qisey kerd.

 

‘Ma vera zextan bêveng nêmanenê’

 

Semra Akyuz bale ant polîtîkayanê zext, asîmîlasyon û dardekerdişî û wina dewam kerd: “Yew problemo ke şarê kurdî ciwîyeno polîtîkaya bênasname verdişî yo. Kurdî zafê reyan çarçewaya babeta kêmî de yenê destgirewtiş û problemê esas nênaskerdişê nasname û ziwanî yo. Seba ke şar estbîyayîşê xo dewam bikero, ziwan esas o. Çinbîyayîşê ziwan û nasnameyî yeno manaya çinbîyayîşê merdimî. Seba nê zî esasê zextê ke şarê kurdî ci dir yeno rî bi rî, polîtîkayê asîmîlasyon û bênasnamebîyayîşî yo. Emser tenê Tirkîya de nê, welatanê cîyayan de zî serê Kurdan de zextî est ê. Bi taybetî Îran de zextî û binpêkerdişî domîyenê. Babete bi Kurdan dir sînordar nîya. Serê bawerîyanê cîayan de zî binpêkerdişê heqan ê cidî est ê.”

 

‘Zextê serê Kurdan nêwînerî de ameyî vîtene’

 

Semra Akyuz dewamê ci de da zanayene ke bi taybetî Îran de zext û binpêkerdişê heqan ê şarê kurdî ser o zêde bîyê û vera nê zilmî bêvengîyêka pîle ya dinya est a. Semra Akyuze va: “Ganî vera nê zilmî bêvengî çin bo. Seba çareserîya probleman ganî kanalê dîyalogî bêrê akerdiş. Veng dana şaranê Tirkîya û Rojhelatê Mîyanî, dinya. Mebê parçeyê nê bêvengîye. Zextê kurdan ser o domîyenê. Nê zextan nêvînaye nêrê.”

 

Semra Akyuz her wina dîyar kerd ke nê çîyê ke herêm de yenê ciwîyayene vera prosesê Aştî û Cimatê Demokratîkî yê û va seba aştîye ganî asayîşê demokratîk û huquqî pê bêro.