MERKEZÊ XEBERAN - KJAR’î eşkera kerd ke rewşa Zeyneb Celaliyan a zindanê Yezîdî yê Îranî de zaf xirab a û cuye aye mîyanê tehûke de ya.

 

Komeleya Cinîyanê Azadan ê Rojhilatê Kurdistanî (KJAR) derheqê rewşa tepişteya siyasî ya kurde Zeyneb Celaliyan de eşkerayîyêke vila kerd û hişyarî da.

 

Eşkerayîye de ame dîyarkerdiş ke rewşa weşîye ya tewr kanêr tepişteya siyasî ya Îranî Zeyneb Celaliyan zaf xirab a û cuye na çalakîkera kurde ya mîyanê zindanê Yezîdî de mîyanê tehluke de ya, ganî lezkî bêra dermankerdene!

 

Ame destnîşankerdene ke dezgehê asayîşî pêşkêşkerdişê her tewrê çimdarîya doktorî û heta heqê giredîyayîşê telefonî yê Zeyneb Celaliyan bi nuştişê mektuba ‘poşmanîye’ mecbûr kenê. Zeyneb Celaliyan semedê îşkenceyê ke aye rê ameyî kerdene, bi tehlukeyê temamî vînîkerdişê roşnîya çimanê xo dir rî bi rî ya ke verê cû zindanê Qerçekî de bi vîrusê Korona kewtebî.

 

KJAR’î destnîşan kerd ke Zeyneb Celaliyan bîya sembolê xoverdayîşê cinîyan yê vera zordarîye; venga azadkerdişê bêşert û merc ê Zeyneb Celaliyan û lezkî neqlkerdişê seba nêweşxaneyî ameye kerdene.

 

Çalakîker û tepişteya siyasî ya kurde Zeyneb Celaliyan (45), serra 2007ine de ameye destbendkerdiş û nêzdîyê 20 serrî yo ke bêyî girewtişê rojêke destûrî zî, zindanê Xoy, Qerçek, Kirman, Kirmanşan û Yezîdî de yena tepiştiş. Aye seserra 2009ine de bi tometê ‘serewedaritiş û giredîyayîşê ke pêwa Partîya Cinîya Azade ya Kurdistanî (PJAK)’ bi cezaya darkerdişî ameye mehkûmkerdene. Dima ra semedê zextanê çalakîker, rêxistin û sazgehanê heqanê merdiman, cezayê dardekerdişî serra 2011ine de bi cezaya heta-hetayî ameye vurnayîş.