ANQARA - Veradayîşa Melîke Goksu û Emine Abîşe, yê ke Zîndanê Cinîyanê Sîncanî de tepişte yê, hetê Komîteya Îdarî û Çimdarîye ra semedê her yewî new aşmî peyser antî.

 

Veradayîşê Melîke Goksu û Emine Abîşe, yê ke Zîndanê Cinîyanê Tîpa Fyê Sîncanî de tepişte yê, bi qerarê Komîteya Îdarî û Çimdarîye reya hîrine ame astengkerdiş. Veradayîşê tepişteyan hetê komîteye ra ke 21ê gulane de kom bîya, bi sebebê ke “têgêrayîşê înan baş nîyo”, semedê her yewî new aşmî peyser antî.

 

Melîke Goksu a ke weçînitişanê herêmî yê 2019ine de ser nameyê Partîya Demokratîke ya Şaran (HDP) sey hemşaredara Qereyazîya Erziromî ameybî weçînitiş, 18ê êlule 2019ine de bi tohmetê “endambîyayîşê rêxistinêk” ameybî tepiştiş. Melîke Goksu a ke cezaya aye 7 serrî û 16 aşmî bî, verê tebaxa 2025ine de semedê hîrê aşman û teşrîna peyêne 2025ine de semedê şeş aşman peyser ameybî antiş.

 

Emîne Abîş a ke 31ê adara 2023ine de dewaya xoîdarekerdişê Sûrî de ameybî tepiştiş, bi tohmetê “endambîyayîşê rêxistine” 7 serrî û 6 aşmî ceza amebî birnayîş. Dimayê veradayîşê aye yê bi şertî tebaxa 2025ine de semedê 3 aşman û teşrîna verêne 2025ine de semedê 6 aşman peyser ameybî antiş û no vernîya veradayîşê aye girewtibî.

 

Tarîxê bîn ê ronîştişê tepişteyanê ke veradayîşê înan ameybî astengkerdiş semedê 22ê sibate ame dîyarkerdiş. Aşmê peyêne de, veradayîşê 5 tepişteyanê Zîndanê Cinîyanê Girewteyê Sîncanî bi qerarê Komîteya Îdarî û Çimdarîye ame astengkerdiş.