ANQARA - Tepişteyê ke Zindanê Cinîyan ê Sîncanî de yenê tepiştiş, semedo ke tehliyeyê înan bi îdîayanê “nêrastan” ameyo astengkerdiş, derheqê endamanê Heyetê Îdarî û Çimdarî de gerre kerd.

 

Tepişteyê ke Zindanê Cinîyan ê Tîpa F ya Sîncanî de yenê tepiştiş û tehlîyeyê înan ameyo astengkerdiş, derheqê endamanê Heyetê Îdarî û Çimdarî de gerre kerd. Ame zanayîş ke mîyanê aşmêke de nê heyetî tehlîyeyê tepişteya nêweşe Pinar Tîkît, Fatma Aslan û reya 7ine zî tehlîyeyê Nedîme Yaklav a ke 34 serrî yo tepişte ya, asteng kerd. Tepişteyan semedê “îdîayanê nêrastan” derheqê endamanê heyetî de Serekîya Meclîsî û Komîsyonê Heqanê Merdiman ê Meclîsî (ÎHÎK) rê seba binpêkerdişê heqan muracaat kerd.

 

Her wina tepişteyan derheqê endamanê heyetî de Serdozgerîya Komare ya Anqarayî de zî gerre kerd. Tepişteyan dîyar kerd ke înan zaf rey waştişê pêvînayîşê bi psîkologî kerdî labelê no waştişê înan nêameyo qebûlkerdiş û dima ra zî erjnayîşê “tewrê pêvînayîşê psîkologî dir nêbîya” ameyo kerdene. Tepişteyan va ke tu bingehê nê erjnayîşan çin o.

 

Ame zanayîş ke tepişteyî do her hewte derheqê endamêke/ê de gerre bikerê.