MERKEZÊ XEBERAN - Halê weşîya tepîşteya sîyasî ya kurde Zeyneb Celaliyan mîyanê tehluke de ya û waştişê aye yê tedawîbîyayîşî hetê rejîmê Îranî ra yeno redkerdiş.

 

Tora Heqanê Merdiman a Kurdistanî derheqê rewşa tepişteya siyasî ya kurde Zeyneb Celaliyan raporêk weşan kerd.

 

Rapor de ame eşkerakerdiş ke Zeyneb Celaliyan semedê nêweşîye çend aşmî yo halêko giran de ya û cuya aye mîyanê tehluke de ya.

 

Sewbîna ame dîyarkerdiş ke dejê zereyî û gonîrijyayîşê Zeyneb Celaliyan est ê; mîyanê no hewte de resayo dereceyo zaf tehlukedar, bi nê şiklî ke çend rojî yo nêeşkena cayê xo ra bilîwa û nika halêko fîzîkî yê zaf xirab de ya.

 

Rapor de ame eşkerakerdiş ke doktoranê Zeynebe dîyar kerdo ke nêweşîya aye nika xirabêr bîya. Semedê na babete doktoran waşto ke lezkî bêra sewqkerdişê merkezanê weşîye yê teberê zindanî ke bêra tedawîkerdiş.

 

Ame eşkerakerdiş ke îdarekarê zindanî bi bahaneyê 'halê şerî' waştişê sewqkerdişê Zeyneb Celalîyane yê seba nêweşxaneyî red kerdo.