MERKEZÊ XEBERAN - Koçberê ke herêma Efrînî ra ameybî û Kobanê de ciwîyayênî, ewro bi merasîmêko qelebalix ver bi bajarê xo Efrînî şinê.

 

Herêma Efrînî ke 18ê Adara 2018ine de hetê çeteyanê girêdayeyê dewleta tirke ra ameybî îşxalkerdiş, peynî de bi des hezaran roniştoxê ci koçber bîyî. Dimayê 8 serranê koçberîye, goreyê madewanê pêameyişê mîyanê îdarekarîya Rojava û hukmatê demkî yê Sûrîye yê semedê agêrayîşê asayîş ê koçberan, verê koçberê Efrînî agêrayî.

 

Herêma Cizîr ke heta nika 4 karwanî agêrayî, ewro bajarê Kobanê ra zî koçberê ke est ê û tede 623 keye estbîyî, bi slogan, tîlîlî û şayîyêka pîl kewtî rayîr û ver bi Efrînî şî.

 

Merasîmê oxirkerdişê şarê Efrînî de, Îdarekarê hêzê Asayîşê Rojava û yê hukmatê demkî, eynî wextî de temsîlkar û îdarekarê bajarê Kobanê û bajarê Helebî û şarê Kobanê amade bîyî.

 

Karwanê ke dewa Rovî ya Başûrê Kobanê de ameyî pêser, uca de hetê îdarekara Kobanê ra eşkerayîya çapemenîye ya girêdayîyê agêrayîşê asayîş ê koçberan ê ver bi bajaranê înan ame dayîş.

 

Sewbîna Mizgîn Xelîl wina va: “Ma sey şarê Kobanê 8 serrî şarê Efrînî kerd verike xo, dej û azarê înan pare kerdî. Ewro ra dima raywanîyêk derg ê koçberîya bi zorî, şarê ma agêrenê mal û warê xo yê resen. Fikr û hîvîyê ma no yo ke na gama pîroz a ke yena eştiş, bierzo ver bi destpêkêko newe yê qetîkerdişê aramî û aştîye Sûriyeyî. Waştişê ma zî o yo ke heme koçberî bi kultur, ziwan û nasnameyê xo reyna agêrê serê herra xo.”