ANQARA - Cinîyê ke tewrê rayîrşîyayîşê “Semedê aştîye game bierze” bîyî, eşkera kerd ke bi îradeyê Abdullah Ocalanî aştî eşkena bêra ca û vengdayîşê statuyî kerdî.

 

Vengdayîşê “Aştî û Cimatê Demokratîkî” ke Rayberê Şarê Kurdî Abdullah Ocalanî 27ê Sibate de kerdbi ser ra serrêka zêde vîyart labelê pêwa nê hema zî dewlete gamêka pozîtîf nêeşta. Bi serkêşîya Partîya Têduştî û Demokrasîyê Şaran (DEM Partî) bi sehezeran kesî xeylêk bajaranê Kurdistan û Tirkîya de bi sloganê ‘semedê aştîye game bierze’ rayîrşîyayîş organîze kerdî.

 

Cinîyê ke Anqara de tewrê rayîrşîyayîşî bîyî eşkera kerdî ke Abdullah Ocalan seba aştîye mifteyo esas o û vengdayîşê gamanê eşkerayan dewlete rê kerdî.

 

Têgêrayîşê kurdî gamanê hewceyî eştî

 

Temsîlkarê Ciwanan ê partîya Têgêrayîşê Kede (EHP) Sevînç Alîm eşkera kerd ke tewrê rayîrşîyayîşê “semedê aştîye game bierzê” bîya û wina va: “Serrêke verê cû proses dest pê kerd. Na serrêka proses dewam keno û têgêrayîşê kurdî gaman eştî. Nika dora hukmatî ya. Ganî game bierzê. Sîyasatê qeyûman hema zî dewam keno. Ganî heme qeyûmî bêrê antene. Ganî ê ke ameyî weçînitiş, agêrê serê wezîfeyê xo. Ganî tepîşteyê siyasîyî bêrê veradayîş. Ganî gamê eşkerayî bêrê eştene.”

 

‘Pêameyişê cimatî ferz o’

 

Sevîm Fîdan zî dîyar kerd ke ganî dewlete game bierzo û wina va: “Rewşa tepişteyan nêbaş a. Tepişteyê nêweşî ganî bêrê veradayîş. Ganî aştî bêra mende kerdene, seba nê zî gamî hewce yê. Ma her tim aştîye wazenê. Cimat ganî pîya pêbêro. Ganî ciwanî na babete de bixebitê. Ganî statuyê seba Abdullah Ocalanî bêro naskerdene.”

 

‘Bi îradeyê Ocalanî eşkeno aver şêro’

 

Husniye Net zî eşkera kerd ke seba ke proses bi serfîrazî netîce bibo, ganî statuyê seba Abdullah Ocalanî bêro naskerdene û va o mifteyo verên ê aştîye yo. Husniye Net va proses bi îradeyê Rayberê Şarê Kurdî Abdullah Ocalanî eşkeno aver şêro û va hewceyê her kesî bi aştîye est a.”