MERKEZÊ XEBERAN - Şubeyê ÎHD’yê Îskenderûnî, semedê hemkarîya bi Prosesê Aştî û Cimatê Demokratîkî reyde, awanîya komeleyî de Nobeta Aştîye da destpêkerdiş.

 

Şubeyê Komeleyê Heqê Merdiman (ÎHD) ê Îskenderûnî yê Hatayî, semedê paştîdayîşê bi Prosesê Aştî û Cimatê Demokratîkî reyde, çalakîya Nobeta Aştîye da destpêkerdiş. Nobete, awanîya komeleyî de ameye girewtiş. Temsîlkarê rêxistinanê cimatê sivîlî û xeylêk kesî ameyî zîyaret. Eywana nobetî de pankartê “Semedê demokrasî veng bidê aştîye” ame daliqnayîş. Hemverfekê Şubeyî Yûsûf Berkyurekî çalakîye de vengdayîş kerd ke ganî dewlete fermanê DMME û AYM’yî bîyaro ca.

 

Yusuf Berkyurekî, bi domdarî va: “Semedê ke nê fersendê ke bi bêpêrodayîş û bêçekbîyayîş reyde ame bidestkerdiş açarya aştîyêka mende, hewce yo gamê sîyasî û huqûqî demêko tewr kilm de bikewê cuye.”

 

Hemverfekê DEM Partî yê Îskenderûnî Ozgur Vuralî zî ard ziwan ke aştî tena bêvengbîyayîşê çekan nîya û va: “Ganî edaletê cimatî bêro ca. Aştî; cuye azad a cinîyan, pabebîyayîşê ciwanan ê seba amoyoxî, cuye merdiman yê teqawûdan, guritişê heqdestê karkeran û talannêkerdişê xozayî ya.”