Elfazî Toral

 

STENBOL - Dayîkanê Şemeyî ra Emîne Erbek ke 1996 de qetliyamê Basê de pî û apê aye merdî, wina va: “Ma kiştoxan nas kenê. Ma rastîyan zanê. Ma wazenê ke gumanbarî bêrê cezakerdene û edalet bêro ca.”

 

Rojanê vîyarteyan de wezîrê edaletî Akin Gurlek, dimayê averşîyayîşanê dosya Gulîstan Doku ke mîyan de walîyê verên ê Dêrsimî û lajê ey zî est o, xeylê kesî ameyî tepiştene, da zanayene ke seba kiştişê "faîlê ci nêdîyarî" Yewîya Daîreya Cigêrayîşê Sucanê Faîlê Ci Nêdîyarî amîya awankerdiş. Bi na yewîne, sere de qetilkerdişê cinî û tutan, 75 bajaran de prosesê cigêrayîşê pêro pîya 638 dosya û 693 hedîseyan dest pêkerd.

 

Wexto ke Tirkiya de qalê kiştişê faîlê ci nêdîyaran beno, çîyê ewilî ke yeno aqilê merdiman Dayîkanê Şemeyî yê. Emîne Erbeke behsê pîyê xo Ahmet Kaya û apê xo Halîl Kaya kerdî, yê ke Çeleyê 1996î de dewa qezaya Basê ya Şirnexî de amîbî destbendkerdiş û bi îşkenceyî amîbî kiştene.

 

‘Waştişê ma edalet o’

 

Emîne Erbeke da zanayene ke aşmêka çeleyê 1996ine de dewa Basê ya Şirnexî de pîyê aye Ahmet Kaya û apê aye Halîl Kaya ameyî destbendkerdiş û va nasnameyê înan qerekolê cendermeyan de vînayî û wesayîto ke cenazeyê înan tede bîyî zî amebi gulevarankerdiş. Emîne Erbeke wina va: “Wexto ke pîyê mi berdî, apê mi zî berdî. Pîyê mi reyde 6 kesî destbend kerdî. Berdî Tabura Taşkonakî. Hîrê rojan îşkence kerdî. 15ê çeleyê 1996ine de wesayîto ke pîyê mi û apê mi, pêro pîya 6 kes tede bîyî, gulevaran kerdî û veşnayî. Dewlete o dewr de îdîa kerd ke PKKyî kerdo. Labelê PKKyî nêkerdbî. Dewlete bi xo kerd û serê hedîse girewt. Labelê ma rastîyan zanê. Ma heme çîyî zaf baş zanê.”

 

‘Seba ke kesê bînî vîndî nêbê mi têkoşîn da’

 

Emîne Erbeke dewamê qiseykerdişê xo de eşkera kerd ke bi serran seba ke gumanbarî bêrê vînayîş têkoşînêko pîl ê huqûqî daya û mîyanê cuye xo de têkoşîn domnaya. Emîne Erbeke wina ard ziwan: “Ma seba vîndîbîyeyanê xo têkoşîn da. Ma şîyî çalakîya roniştişî ya Wareyê Galatasarayî. Seba ke edalet bêro ca ma vengê xo da eşnawitiş. Bi hêvîya ke ma agahîyêk bigîrê ma têkoşîn da. Ma dejêko pîl ant. Bi seyan kesî bi destê dewlete ameyî vîndîkerdiş. Seba ke kesê bînî vîndî nêbê mi têkoşînê xo da.”

 

‘Wa îşkenceyî peynî bibê’

 

Emîne Erbeke dewam de dîyar kerd ke cenazeyî o dewr de hetê leşkeran ra bi komî ameyî definkerdiş û va: “2012 de ma şîyî cayê ke cenazeyî tede bîyî. Ma esteyê pîyê xo vetî û berdî dewa xo. Kiştoxê heme faîlê ci nêdîyaran dewlet a. Ya ke na kena dewlete bi xo ya. Wa êdî kes nêmiro. Wa hesabê vîndîbîyeyan bêro persayîş. Wa îşkenceyî peynî bibê. Wa wezîrê edaletî sozo ke daya bîyaro ca. Wa berpirsîyarî bêrê muhakemekerdiş û hesab bidê.”