STENBOL - Seba ke hîrê kesan wextê serdayîşê zîndanî de silam dabî tepişteyanê bînan, aşmêke qedexeyê serdayîşî înan rê ame birnayîş.

 

Îdarekarîya Zîndanê Cinîyan ê Bakirkoyî, seba ke merdimê tepişteya bi nameyê Hatîce Yildiz; Ferhat Yildiz, Fînce Akmane û Firat Kaya silam dabî tepişteyanê bînan, pêvînayîşê înan asteng kerd.

 

Fînce Akmane vera nê qerarî nêrazîbîyayîş mojna û dîyar kerd ke paştîdayîşê bi tepişteyanê zîndanan reyde sey sucî yeno mojnayîş û va: "Heme tepişteyî merdimê ma yê. Çi ceza ma rê bidê zî, ma do her tim silam bidê yewbînan."

 

Ame musayîş ke merdimê tepişteyan û avûkatanê înan do vera qedexeyê serdayîşî yê îdarekarîya zîndanî, muracatê rayîrê qanûnî bikerê.