ANQARA - Serekê Pêroyî yê MHPyî Devlet Bahçelî dîyar kerd ke prosesê Aştî û Cimatê Demokratîk de nika demê prosesê viraştişê qanûnan o û va: “Statuyê Abdullah Ocalanî ganî bêro dîyarkerdiş. Na mesela semedê ma muhîm a. Ganî problemê statuyê Abdullah Ocalanî bêro çareserkerdiş.”

 

Serekê Pêroyî yê MHPyî Devlet Bahçelî Meclîsî de kombîyayîşê partîya xo de qisey kerd. Devlet Bahçelî va ke pawitişê aştîye manaya zeyîfî nîyo û helwestê aştîye yê Tirkîya manaya ke do heqanê xo yê Kibrisî û Deryayê Spîyî nêpawitîşî nîyo. Devlet Bahçelî ard ziwan ke mîyanê nê averşîyayîşan de ganî Tirkîya hetê ekonomî, kulturî û komelî ra seferber bibo û proses ke Tirkîya de dest pêkerd tîya cayêk muhîm gêno.

 

Prosesê viraştişê qanûnan

 

Devlet Bahçelî va ke yew meselayê tewr muhîm meseleyê çareserîye yo ke ganî binê banê Meclîsî de bêro îdarekerdiş û va: “Komîsyonê Meclîsî raporê xo yê hembeş vet û xebatanê xo peynî kerd. Averşîyayîşê prosesî bi qanûnan dir zaf muhîm o. Nika dore de prosesê viraştişê qanûnan est o. Meclîsê ma do dest bi viraştişê qanûnan bikero. Her partîye ra do pêşnîyazî bêrê girewtiş û çarçeweya viraştişê qanûnan do goreyê îradeyê şarî bêro dîyarkerdiş. Nê prosesê muhîmî de ganî kes milletê ma yewbînan ra dûr nêkero, hemver nêkero û tu kes yadkerdişê şehîdanê ma ser o hamaset nêkero û biratîya ma xirab nêkero.”

 

‘Ganî problemê statuyê Abdullah Ocalanî bêro çareserkerdiş’

 

Devlet Bahçelî ard ziwan ke statuyê Rayberê Şarê Kurdî Abdullah Ocalan semedê prosesî muhîm o û nê çî ard ziwan: “Statuyê Abdullah Ocalanî ganî bêro dîyarkerdiş. Na mesela semedê ma muhîm a. No ganî bêro peygoşkerdiş. Ganî no verbiçim bibo. PKK bi merasimêk çekanê xo veşnabî. O tarîxî bî û PKK piştîdayîşê prosesî kerdibî. Eke ma biwazê proses biherikîyo û heme endamanê rêxistine çekanê xo biverdê, ganî refleksê lezkî bêrê mojnayîş û xesasî bêrê mojnayîş û goreyê medyaya dîjîtale tênêgêrê. Eke semedê Abdullah Ocalanî problemê statuyê est o ganî no problem bi hawayêk semedê başbîyayîşê Tirkîya bêro çareserkerdiş û bikerê rojeve xo. Ganî nameyê mekanîzmayêk ke semedê nê bêro awankerdiş zî bi hawayêk huqûqê biratîye û demokrasî pê bîyarê, bêro awankerdiş. Ganî nameyê ci zî “Prosesê Aştîye û Koordinatorîya Sîyasî” bibo. Hêvîya ma na ya ke Rayberê Awankerdoxî yê PKKyî binê statuyêk de wezîfeyê xo bica bîyaro.”

 

Bahçelî mesaj da îqtîdar

 

Devlet Bahçelî polîtîkayê îqtîdarî ser o zî wina va: “Ganî Hevalbendîya Cumhurî sey yewbînan têbigêro. Ganî heme wezaretî sey cepheyêk têbigêrê. Ganî proses binê sînorê teng de nêro girewtiş û bi hesabê qijî û berjewendîyê partîye nêro sînorkerdiş. Îdarekerdişê Tirkîya cidîyet wazeno. Talîbîyayîşê dewlete zî wina erjan nîyo.”