MERKEZÊ XEBERAN - Platformê Cinîyanê Datçayî, eşkerayîya derheqê Gulistan Dokuyî de, waştişê ancî akerdişê heme dewayê cinîyanê ke binê şertê bigumananî de merdî kerd û va ke ganî cipersayîşê bi tesîrî bêrê kerdiş û cezayê raştîn bêrê dayîş.

 

Platformê Cinîyanê Datçayî derheqê Gulistan Dokuyî ya ke 5ê çeleyê 2020ine de Dêrsim de vînî bîya eşkerayîyêke weşan kerd.

 

Rojwelate, Nadira, Garibe, Rojîne çi ame sereyê înan?

 

Cinîyan eşkerayîye de wina vatî: “Çi ame sereyê Rojwelat Kizmaz, hevala Gulistan Dokuye? Çi ame sereyê Îpek Ere, ke hetê çawişêk ra tecawizê aye ame kerdiş? Çi ame sereyê Rabia Naze? Çi ame sereyê Garibe Gezer, ke zîndanî de hucreya xo de ameye kiştiş û hêrişê cinsîyetî aye rê ame kerdiş? Çi ame sereyê Nadira Kadîrovay, ke binê şertê bigumanan de keyeyê parlamenterê AKPyî Şîrîn Unalî de merde ameye vînayîş? Çi ame sereyê Yeldana Kahirmane, ke dimayê hêrişê cinsîyetî ke hetê parlamenterê AKPyî Tolga Agarî ra aye ser ame kerdiş, binê şertê bigumanan de merde ameye vînayîş? Çi ame sereyê Tuana Elif Torune, ke yeno vatiş qezayêka bigumanan de Goreleyî merda? Çi ame sereyê Rojîn Kabaîşe, ke Wan de wendêne, dimayê vejîyayîşê yurtî vînî bîya û cenazeya aye Golê Wanî de ameye vînayîş? Çi ame sereyê Îlayda Zorluye, ke dimayê ke polîsî keyeyê aye rê veng dayî û vatî ke ‘aye tewrê protestoyanê 8ê adare bena’, binê şertê bigumanan de merde? Ma wazenê ke nê heme dewayî yew bi yew ancî bêrê akerdiş, cipersayîşê bi tesîrî bêrê kerdiş û cezayê raştîn bêrê dayîş. Bi israrê bêcezaverdayîşî cinî cuya xo bedelnenê. Ma wazenê ke no lezkî bêro terkkerdiş. Û ma do bêveng nêmanê. Ma wazenê ke na tora lêşine ya têkilîyan lezkî bêro eşkerakerdiş.”