Jiyan Gencan

 

HESEKÊ - Şêxa Hemê Xelîl a ke koçbera Serêkanîyeyî ya 7 serrî yo bi hêvîya agêrayîşê bajarê xo ciwîyena. Şêxa Hemê Xelîl va: “Bawerîya ma est a ke ma agêrê, la eke agêrayîşêk ma bibo ganî bi asayîş bibo.”

 

Serra 2019ine de bajarê Serêkanîye hetê dewleta tirkî û hêzê girêdayeyê înan ra ame îşxalkerdiş. Bi hezaran roniştoxê bajarî semedê şerî û îşxalkerdişî cayê xo ra koçber bîyî. Nika 75 hezar koçberî kampan de manenê. Şêxa Hemê Xelîl zî yew koçberanê Serêkanîye ra ya. Şêxa Hemê Xelîl ajansê ma rê qalê koçberîya xo ya 7 serran kerd.

 

Şêxa Hemê Xelîl destpêkê qiseykerdişê xo de qalê vejîyayîşê Serêkanîye kerd û va: “Serra 2019ine de ma Serêkanîye ra koçber bîyî. No 7 serrê ma yo ke ma Bajarê Hesekî de kampê Serêkanîye de manenê. Kampe de ma zaf zehmetîyan ancenê. Ma têkoşîn kenê ke ma bieşkê agêrê Serêkanîye. Ma wazenê rojêk verê rojêk agêrê cayê xo.”

 

‘Ma agêrayîşêk bi rûmet semedê cayê xo wazenê’

 

Şêxa Hemê Xelîl dîyar kerd ke ê agêrayîşêk bi asayîş wazenê û wina ard ziwan: “Ma agêrayîşêk bi rûmet semedê cayê xo wazenê. Koçberbîyayîşê ma semedê xebatanê ma yo. Eke agêrayîşêk ma bibo ganî hêzê ma yê pawitişê esasî zî bibo, yan zî sewbîna ma agêrayîş qebul nêkenê. Çimkî ganî sey cimat pawitişê ma bibo. Heta çeteyê Serêkanîye keyeyê ma veng nêkerê ma nêşinê Serêkanîye. Ma wazenê bi serberzî agêrê cayê xo.”

 

‘Ma kampan de zehmetîyan ancenê’

 

Şêxa Hemê Xelîl ard ziwan ke cuya mîyanê kampan de zaf zehmet a û wina va: “Ma kampan de zehmetîyan ancenê. Zimistanî ma zaf cemedênê û çadirê ma rijîyayê, hamnanî zî german ra ma nêeşkenê binê çadran de bimanê. No 7 serrê ma yo ke ma na rewşe de yê. Hetkarî yena kerdiş la qîm nêkeno. Ma sey roniştoxanê Serêkanîye semedê agêrayîşê cayê xo xo ver danê.”

 

‘Bawerîya ma est a ke ma agêrê’

 

Şêxa Hemê Xelîl ard ziwan ke ê bi hêvî yê ke demêk nêzdî de agêrê cayê xo û va: “Bawerîya ma est a ke ma agêrê, la eke agêrayîşêk ma bibo ganî bi asayîş bibo. Bêpawitiş ma nêwazenê şêrê û ancî bêrê qetilkerdiş. Ganî keyeyê ma bibo ke ma bieşkê uca de roşê. Ma wazenê ke herra xo ser o cayê xo de biciwîyê. Wexto ke ma agêrê ganî çeteyî uca de nêbê, ma no qebul nêkenê, ma nêwazenê bindest biciwîyê.”

 

‘Ma do heta peynîye xo ver bidê’

 

Şêxa Hemê Xelîl dîyar kerd ke ê pabeyê agahîya agêrayîşî yê û wina qedêna: “Vengê ma semedê heme kesî yo, ma agêrayîşêk bi asayîş wazenê. Tena waştişê ma no yo ke ma cayê xo de biciwîyê. Keyeyê ma zî wêran bîyî wa bibo. Ma do şêrê awan bikerê. Ma semedê dewaya xo xo ver danê û têkoşîn kenê. Heta dlopêk gonî bedenê ma de bibo ma do têkoşînê xo bidomnê. Ma roniştoxê Serêkanîye zaf zehmetîyan antî. La ma do heta peynîye xo ver bidê. Tena wa agêrayîşêk ma yê biasayîş bibo.”