MERKEZÊ XEBERAN - Endama Konseya Serekîya Pêroyîye ya KCKyî Sozdar Avesta dîyar kerd ke qanûnê ke ganî seba serkewtişê prosesî bivejîyê zelal ê û waşt ke azadîya Rayber Apoyî bêro caardene û wanûnê hewceyî bivejîyê.

 

Endama Konseya Serekîya Pêroyîye ya KCK’yî Sozdar Avesta bernameyêkê taybetî yê Stêrk TV de nirxnayîşê muhîmî kerdî.

 

Mîlyonan kesî herikyayî Newroze

 

Sozdar Avesta vat: “Newroza emserî bîye Newroza azadîya fîzîkî ya Rayber Apoyî. Bi mîlyonan Newroze pîroz kerd û hema zî pîrozkerdişî dewam kenê. Mesajê Rayber Apoyî heme waran ra ame wendene û sey vengdayîşê 27ê Sibata 2025î muhîm, bimana û pirr bî. Şarî heme waran ra azadîya fîzîkî ya Rayber Apoyî sey babeta vernîye da xo ver û vengdayîşê azadîya Rayberîye kerd. Na Newroze bîye sey referandumêk.

 

Dewrêk de ke Prosesê Haştî û Komelê Demokratîkî dewam keno hêrişê ke Newroze ra dima şarê kurdan ser o ameyî kerdene, qebûl nêbenê. Nê caardişî sabotajê prosesî yê. Mîsal, Rayber Apo hîna Newroze rê mesajêko vîdeoyin nêşawit. Eke bêro hesabê înan vanê temam la eke goreyê hesabanê înan nêbo sey vîyarteyî hereket kenê. Wina nêbeno, her kes naye vîneno. Ganî lez nê tepşê xo ra fek verdê.”

 

Ganî heqê şarê kurdî binpay nêbê

 

Rayber Apoyî zaf rey ard ziwan; problemê kurdan bi Komare çin o la Komare demokratîk nîya. Kurdan de amancê parçekerdişê welatî çin o la no welat ganî heqê şarê kurdan binpay nêkero ke pîya bieşkê biciwîyê. Seba naye ganî qanûnî bivejîyê. Na paradîgma, na îdeolojî û na xete wayîrê ci Rayber Apo yo. La Rayber Apo tecrîd de yo, hîna kes nêşêno vajo ke tecrîd de nîyo.”

 

Serkewtişê prosesî heme herême pozîtîf ser o do tesîr bikero

 

Tirkîya de çareserîya meseleyê kurdan helbet dormeyê xo ser o zî tesîr kena. Sere de dewletê cîranî û heme herême ser o tesîrêko cidî do bibo û vera hêzanê hegemonîkan ke şaran qurbanê feydeyanê xo kenê, do bibo asteng. Şarî bi serkewtişê nê prosesî do heqê xo bigîrê.”

 

Yewbîyayîşê kurdan o demokratîk do lez bibo

 

Şarê kurdan mesajê xo yo bingeyin da; Newroze rasta zî kongreyê demokrasîye bî, şarê ma qerarê xo da. No qerar zî yewbîyayîşê şarê kurdan bî. Ma sey KCK’yî eşkerayîye daye û piştîdayîşê xo dîyar kerd. Sey Têgêrayîşê Azadîye heme têkoşînê ma têkoşînê yewbîyayîşê şarê kurdan a. Na babete de heme partîyanê sîyasîyê Kurdîstanî rê ma reyna vanê ke na mesela zaf muhîm a, stratejîk a û wa erey nêkewo. Feydeyê partîyan, tena yew parçe yan yew keyeyî esas nêgêno.”

 

4ê nîsane roja bîyayîşê hemînan a

 

Rayber Apo seba heme merdimîye şansêko gird o. Merdimîye gama ke bi Rayber Apoyî azad biciwîyo, do hîna emnîyetin, hîna biaramî bibo. Coka roja bîyayîşê Rayber Apoyî roja bîyayîşê hemînan a. Roja bîyayîşê heme şaran a ke azadîye ra bawer kenê.”

 

Her ca ra do şitilê daran bêrê ronayene, ciwanî Rayber Apoyî hîna zêde biwanê, şarê ma paradîgmaya Rayber Apoyî hîna rind fehm bikero. Rayber Apo kam o û seba merdimîye wazeno se bikero, ma ganî hîna rind bizanê.”