MERKEZÊ XEBERAN - Kampê Multecîyan ê Mexmûrî de 18ine Festîvala Kultur û Sporî yê 4ê Nîsane ke bi wesîleya rojbîyayîşê Rayberê Şarê Kurdî Abdullah Ocalanî yeno organîzekerdiş, bi akerdişê nawitgehê hunerî dewam keno.

 

Kampê Multecîyan ê Şehîd Rustem Cûdî (Mexmûr) de 18ine Festîvalê Kultur û Sporî yê 4ê Nîsane ke bi wesîleya Rojbîyayîşê Rayberê Şarê Kurdî Abdullah Ocalanî yeno organîzekerdiş, bi akerdişê nawitgehê hunerî dewam keno.

 

Nawitgehê Hunerî yê ke salonê konferansî de ameybî amadekerdîş, zafê hunerê destî yê ke bi destê wendekar, hunermend, tutî û ciwanê kampî ameyî viraştiş ameyî pêşkêşkerdiş. Nawitgehê ke ewro sereyê sibayî ame akerdiş do heta 4ê Nîsane zîyaretê şarî rê akerdo bimano.

 

Akerdişê nawitgehî bi deqeyêk rêzgirewtişê şehîdanê têkoşînê Azadîya Kurdistanî dest pêkerd. Dima ra wendekarê Atolyeya Şehîd Adil Mêrdîn, Zozan Hilalî qiseykerdişê akerdişî kerd.

 

Zozan Hilalî destpêkê qiseykerdişê xo de rojbîyayîşê Rayberê Şarê Kurdî Abdullah Ocalanî yê 77 serrîye pîroz kerd û wina va: “Ewro tena rojbîyayîşê Rayber Apo nîyo, eynî wextî de rojbîyayîşê pêroyî yê şarê kurdî yo. Şarê kurdî wayîrê tarîxêk kan yê kultur û hunerî yo. Her wext pawitişê kultur û ziwanê xo kerd, nê semedî ra zî rastê zaf qirkerdiş û asîmilasyonî ame. Şarê kurdî yê ke mîyanê tarîtîyêk de ciwîyayîne, bi xêrê Rayber Apo dest bi têkoşînê azadîye kerd. Nê semedî ra zî 4ê Nîsane ma rê wayîrê muhîmîyêk zêde yo. Ma do heta peynîye taqîbkerdoxê rêça Rayber Apo bê.”

 

Sewbîna semedê ke roja 2ê nîsane roja tutanê astengdarî ya, qûrdelayê nawitgehî hetê tutanê astengdarî yê wendekaran ê Merkezê Hêvîye ra ame birnayîş û nawitgeh zîyaretî rê ame akerdiş.​​​​​​​​​​​​​​​​