MERKEZÊ XEBERAN - Şerê mîyanê Îsraîl-DYA û Îranî roja 29ine de dewam keno. Yew reye verêne yewser tesîsatê nuklearî yê Îranî ser o ame vistiş.

 

Şerê mîyanê Îsraîl-DYA û Îranî roja 29ine de dewam keno. Yew hetî ra DYA mesajê sey “Beno ke nê hewteyî muzakere bêrê kerdiş” dano û heto bîn ra zî Îsraîlî yew reya verêne yewser tesîsatê nukleerî yê Îranî hedef girewtî. Husîyên Yemenî de zî tehdîdê tewrbîyayîşê şerî kerdî.

 

Neql bî ke hînî fuzeyê ke hetê Îranî ra ameyî eştiş asmênê Tel Avîvî de ameyî dîyayîş û hînê înan kewtê bajar. Medyaya Îsraîlî zî va ke sîstemê pawitişê hewayî heme fuzeyan nêvindarneno û bajarî de kaos est o.

 

Heto bîn ra neql bî ke hêzê Îsraîl-DYAyî wareyê Santralê Nukleerî yê bajarê Buşehrî yê Îranî hedef girewtî. Dîyar bî ke dimayê nê hêrişan, herême de fuzeyê Tomahawkî ameyî şuxilnayîş. Artêşa Îsraîlî tehdîdê “Ma do hêrişan hîra bikerê” kerd û Îranî zî hişyarîya cewabdayîşî kerd.

 

Wezaretê Karê Zereyî yê Bahreynî hesabê xo yê Xî ser o dîyar kerd ke netîceya hêrişanê Îranî de tesîsatêk de şewat vejîya û no adir ame tefênayîş. Ver bi serê sibayî hîrê reyan seranserê welatî de vengê sîrenan ame û venga welatijan ame kerdiş ke derbasê herêmê biasayîş bibê. 

 

Verfekê Muhafizê Millî yê Kuweytî Cedean Fadil va ke 24 saetê peyêne de herêmê cîyayê welatî de 6 teyaranê bêmerdimî vistê. Wezaretê Karê Teberî yê Erebistanê Siûdî zî eşkerayîyêk va ke fuzeyêka balîstîk a ke paytextê Rîyadî hedef gêrewtêne hetê sîstemê hewayî ra ameye îmhakerdiş.

 

Wezaretê Pawitişî yê Emîrnişînanê Yewbîyayeyê Ereban zî dîyar kerd ke sîstemê pawitişê hewayî û teyaranê şerî, fuzeyî û dronê ke hetê Îranî ra ameyî eştiş bêtesîr kerdî. Dîyar bî ke vengê teqîyayîşê ke Ebu Dabî û Dubayî de ameyî eşnawitiş, operasyonê îmhakerdişê fuzeyan de ciwîyayî.

 

Medyaya fermî ya Îranî neql kerd ke hêzê DYA-Îsraîlî şewa bîne noqteyê stratejîkî yê herêmê mîyanên yê welatî de vistê. Mîyanê nê cayan de Tesîsê Awa Girane ya Hondabeyî, Merkezê Şuxilnayîşê Uranyumî yê Erdekanî û fabrikayê polayî yê Huzistanî û Mubarekeyî est ê.

 

Artêşa Îsraîlî piştrast kerd ke di merkezê nukleerî ameyo pirodayîş. Selahîyetdaranê Îranî zî vatî ke tesîsatan de tu radyasyon vila nêbîyo.

 

Wezîrê Karê Teberî yê Îranî Abbas Erakçî zî va: “Do bedelê nê, semedê Îsraîlî giran bo. No hêrîş, hemverê ruhê muhletê Trumpî yê semedê dîplomasî dabi yo.”

 

Serekê DYAyî Donald Trump dîyar kerd ke Îran wazeno pê bikero û hîn hêrişî ameyî taloqkerdiş la îdarekardişê Tehranî na îdîa zûr a û va “heta aştîyêk qetî pê nêro” do masa ser de nêşinê ro.

 

Wezîrê Karê Teberî yê DYAyî Marco Rubio ke lûtkeyê G7î semedê Parîsî de yo, dîyar kerd ke ê piştîdayîş danê şerîkanê xo yê ke Îran Boxazê Hurmuzî de keştîyanê înan ra “xerac” girewtene hewl dano. Rubio va: “Ma do nê karî hewteyê vernî de peynî bikerê û Îran do her demî ra zêde zeîf bibo.”

 

Seranserê Îran û Rojhelatî de mîyanê 24 saetan de 12 sivîlî semedê hêrişanê hewayî dinyaya xo bedelnayî û 37 sivîlî zî birîndar bîyî. Artêşa Îsraîlî temamê şewe de noqteyê stratejîkî hedef girewtî û bajarê Rojhelatî de zî vengê teqînan ame eşnawitiş. Neql bî ke teyaranê Îsraîlî û DYAyî, bingehê leşkerîyê stratejîkî yê nêzdîyê Kirmaşanî û rampayê fuzeyan hedef girewtî. Vengê teqînayîşê girdî merkezê bajarî de zî ame eşnawitiş.

 

Komîteya Karê Teberî ya Partîya Cuya Azadî ya Kurdistanî (PJAK), neql kerd ke semedê Kongreya Azadîya Îranî ya ke yeno pawitiş ke 28-29ê adare de Londonî de bêro organîzekerdiş, amebî dawetkerdiş la dima ra lîsteya dawetî ra ameyî vetiş. Eşkerayîye de ame vatiş ke prosesê kongreye bi hawayêk zelal û demokratîk nêame îdarekerdiş.​​​​​​​​​​​​​​​​