Gulîstan Gulmuş

 

SEMSÛR - Hemşaredara Bulamî Kamîle Ocak dîyar kerd ke aye semedê nîşandayîşê îradeyê cinîyan ê hemverê hişmendîya serdestê mêrdan Bulamî de ber bi ber gêrayê û amadekerdiş kenê ke cinîyan dir projeyanê berardişê alternatîf aver berê ta ke cuya komelî û krîzê ekonomî bêro çareserkerdiş.

 

Weçînitişê îdarekarîya herêmî 31ê adara 2024ine de bajarê seranserê Tirkîya û Kurdistanî de ameyî organîzekerdiş. Netîceya nê weçînitişî de, Partîya Têduştî û Demokrasîyê Şaran (DEM Partî) zaf bajar, qeza û bajarokan de şaredarî bidest kerd. Yew cayê ke DEM Partîyî tîya de şaredarî bidest kerd zî bajarokê Bulamî ya qezaya Çelîxanî ya Semsûrî ya.

 

Hemşaredara Bulamî Kamîle Ocak, derheqê xebatanê ke ê serrê vîyarteyî de kerdê, agahî pare kerd.

 

‘Îrtîbatê ma şarî dir zaf xurt o’

 

Kamîle Ocak dîyar kerd ke aye destpêk de semedê sîstemê serdestê mêrdan Bulamî de wareyê hemşaredarîya cinîyan de zehmetî antê û va: “Destpêk de, ê îradeyê cinîyan qebul nêkerdêne; ma rastî zehmetîyanê nê yewî dî, la ma ê derbas kerd. Rolêk hetê komelî ra ameyo dîyarkerdiş. Ti cinî ya, ganî ti keyede roşê, tutê to est ê, ti werd virazena, ti şina zîyanan, rûtînê klasîkî. La ma zî wayîrê îrade yê û ma hewce vîna ke ma nê hişmendîye zorê ci berê. Peynîye de, nê şaredarîyî bi îradeyê cinîyan yenê bidestkerdiş. Ma nika zaf rind aver şinê. Îrtîbatê ma bi şarî dir nê wareyî de bi rastî zî xurt o, ma nê wareyî de wayîrê avantajî yê.”

 

‘Ma cinîyan dir îrtîbat de yê’

 

Kamîle Ocak dîyar kerd ke ê zafê reyan şarî dir kombîyayîş organîze kenê û va: “Ma şîyî her berî, ma her hevalêka cinî dir îrtîbat rona. Îrtîbatê ma cinîyanê tîya dir zaf xurt o. Ma hay hewldayîşê ke ma kerdî nîyê, la wexto ke ma peyser ewnîyenê, ma vînenê ke ma rêçek verdeya. Ma kombîyayîşê cinîyan organîze kenê û cîranî est ê ke nînê, nê semedî ra ma vanê ‘Eke ê nêrê, ma do şêrê verê înan.’ Ma danê berê înan ro. Ma persenê ‘Problemêk, waştişêk, rexneyek yan pêşnîyazîyêk şima est o?’ Wexto ke ma cinîyanê Bulamî waştişanê înan persenê, ê vanê ke hişmendîya înan ya cinîyan wina kêm bîya ke ê bi hişmendîyêk sîstematîk ê mêrdan fikirîyenê. Ma rayîran wazenê, ma dêsan wazenê, ma awe wazenê. Nê çî yê ke her şaredarî şena bikero, la wexto ke ez persena cinî bi rastî çi wazenê, cewab çin o. Nê semedî ra potansiyelê ma est o ke ma nê yewbîyayîş û cuya hembeş tîya de bica bîyarê. Semedê nê, ma bi rastî hewceyê vengêk xurtêr ê.”

 

Semedê cinîyan projeyanê komelî û ekonomî

 

Kamîle Ocak dîyar kerd ke semedê ke ê herêma zelzeleyî de yê, ê nêeşkayî tewrê xebatanê cinîyan bibê û va: “Tîya de, çimeyê debara ma yê ramitişî tena tutûn o. Teberê tutûnî çîyêk bîn ma de çin o. Xebatê ma yê zêde çin ê. Tutûn zî rindî berardiş nêdano. Tewirêk vîrus est o ke tesîrê tutûnî ser o keno û wexto ke o bibo, ma nêşenê a serre berardişêk bigîrê. Berardişê serrê vîyarteyî hema zî keyeyê ma de yo. Nê semedî ra ma bale ant çîyanê ke ma eşkenê hevalanê xo yê cinîyan dir bikerê. Di parselê herrî yê ma yê nêameyê şuxilnayîş est ê, her yew di donim girdîya înan est a. Ma fikirîyenê ke uca de zeferanî biramê. Eke ma bieşkê zeferanî bipawê û pîl bikerê, ma eşkenê tewr tay tutûnî ra zêde hetêk ekonomîk, hêzêk ekonomîk peyda bikerê. Ma plan kenê ke nê çî yewbîyayîşî bi cinîyê bînan dir bikerê.“​​​​​​​​​​​​​​​​