AMED- Komîteya Amadekar a Newroza Amedî eşkerayî daye û nê vengdayîşî kerd: “ Ma heme şarê xo ke seba têduştî û azadîye xebitîyeno, seba xurtkerdişê yewîye, azadîye, demokrasî û têduştîye silaynenê Meydanê Newroze yê Amedî.”

 

Hemsereka DEM Partî ya Amedî Gulşen Ozer vat: “Newroze tarîxê xoverdayîşê kurdan de cayêko muhîm gêna. Ma heme şarê xo silaynenê Newroza azadî û aştîye.”

 

Dima ra eşkerayîya kurmancî hetê çalakîkera Têgêrayîşê Cinîyanê Azadan (TJA) Arzu Karaman ra, ya tirkî zî hetê Komeleya Huqûqnasanê Semedê Azadîye (OHD) Hasan Akengîn ra ameye wendîş.

 

‘Ganî ruhê yewîya neteweyî destkewte bêrê pawitiş’

 

Arzu Karaman ard ziwan ke şarê Rojhelatê Mîyanênî û kurdî bi polîtîkayê înkar û îmhayê ke bi seserran dewam keno rî bi rî yê û wina va: “Nê herrî ke hêzê hegemonê mîyanneteweyî hewl danê goreyê berjewendîyê xo bivurnê, her roje şer û wêranîye rê şahidîye kenê. Nê hêrişê ke azadî, têduştî û yewîya şaran hedef gênê, benê sebebê qetlê bi seyan merdimî. Wareyê ke tewr zaf hêrîş ser o ameyo domnayîş zî Rojava yo. Şarê Rojava destkewtişê xo awan kerdo û bi qerardarîyêk pîl înan pawito. Şarê Rojava pêwa heme hesabê herêmî, destkewtişê muhîmî bidest kerdê. Bêguman, hêzê yewane ke nê destkewtişan mumkin kerd, dînamîzmê ke hetê xoverdayîşê rêxistinkerdeyê şarî ra ameyo viraştiş o. Çîyê ke ewro ganî bêro kerdiş, no yo ke bi ruhê yewîya neteweyî nê destkewtişî bêrê pawitiş û hîna zêde bêrê hîrakerdiş.“

 

Eşkerayîya Komîteya Newroze de ame wina vatene: “Şarê Rojhelatê Mîyanênî û kurdî, bi seserran o vera sîyasetê înkar û çinkerdişî yê. Hêrişê tewr dergî Rojava de qewimîyayê. Şarê Rojava destkewtişê xo girewtê û bi qerardarîyêka girde ê pawitî.

Tirkîya de zî prosesêko tarîxî dewam keno. Prosesê Aştî û Komelê Demokratîkî ke Rayberê Şarê Kurdî Abdullah Ocalan 27ê sibata 2025î de da destpêkerdene, ewro mesafeyêka muhîme kerd. Seba ma o krîtîk o yo ke xeta têkoşînî ke na berpirsîyarîya tarîxî ke Birêz Ocalanî girewta xo milî asanêr bikerê, xurt bikerê. Sermuzakerekerdoxê prosesê vurîyayîşê demokratîkî Birêz Ocalanî şertanê ci rindkerdiş, hem ma rê hem şaran rê waştişêko ke bê ney nêbeno.

 

21ê adare de Amed de ma bi beşdarîya mîlyonan Newroze pîroz kenê. Eynî wext de ma bawer ê ke na Newroze do biba wesarê hempar ê şarê kurdî. Çar parçeyanê Kurdîstanî de bi ruhê yewbîyayîşê neteweyî Newroze do bêra pîrozkerdene.”

 

Komîteye peynîye de vat: “Ma veng danê cinî û ciwan û heme şaran ke tewr vernî de govenda azadîye gird bikerê. Bi ruhê netewê demokratîk û yewbîyayîşî ma veng danê ke cuya azade ya şarê kurdî girs bikerê. Ma heme şarê xo ke seypêyî û azadîye paweno, silaynenê Meydanê Newroza Amedî.”