MERKEZÊ XEBERAN - YRAyî eşkera kerd ke Sûrîye de serra 2025ine de tewr tay 9 rojnamegerî ameyî qetilkerdiş, 15 rojnamegerî birîndar bîyî û nêzdîyê 11 rojnamegerî ameyî destbendkerdiş.

 

Yewîya Neqlkerdişê Azadî (YRA) derheqê binpaykerdişanê ke serra 2025ine de hemverê rojnamegeranê Sûrîye de ameyî kerdiş, raport weşan kerd.

 

YRAyî va: “Dimayê rijîyayîşê rejîmê Baasî Sûrîye de, zaf vurîyayîşê esasî yê sîyasî rî dayî. Bi ameyîşê serra 2025ine Sûrîye derbasê qonaxêk vurnayîşî bî ke yewser tesîrê rewşa heqê merdiman û azadîya qalkerdişî, seranserê Sûrîye ser o kerd.”

 

YRAyî ard vîr ke bi ameyîşê hukmatê demkî îqtîdarî ser, sucî û kerdoxîyê hemverê heqê merdiman, bi taybetî zî hemverê rojnamegeran, zêde bîyî.

 

Raportî de ame dîyarkerdiş ke serra 2025ine de hêrişanê teyaranê bêmerdimî yê Tirkîya, hêrişanê Îsraîlî û hêzê girêdayeyê hukmatê demkî û grubê çekdarê nênasnaye de, tewr tay 9 rojnamegerî ameyî qetilkerdiş û zêdeyêr 15 rojnamegerî birîndar bîyî.

 

YRAyî va ke 11 rojnamegerî ameyî tepiştiş ke xeylê înan hetê hukmatê demkî ra ameyî tepiştiş.

 

YRAyî peynîye de veng da pawitişê rojnamegeran.​​​​​​​​​​​​​​​​