AMED- Platformê Yewîya Cinîyanê Kurdan Odaya Tîcaret û Sanayî ya Amedî (DTSO) de bi şîarê “Bi pêşengî û yewîya cinîyanê kurdan ver bi awankerdişê yewbîyayîşê neteweyî” kombîyayîşêk organîze kerd.

 

Zaf cinîyê beşdarê programî bîyî û programî bi hurmetvindertişî dest pêkerd.

 

Endama platformî Salîha Ayata vat ke do bêro munaqeşakerdene ke ganî senî hemverê sîyasetî de ke vera cinîyan yeno rayraberdene torra têkoşînî bêro viraştene.

 

‘Ganî cinî zemînê hemparî de bêrê têhet’

 

Hemvertoxa Înîsîyatîfê Yewbîyayîşê Demokratîkî Gulcane Kaçmaz Sayyîgît vat ke hîna cinîyê kurdî nêeşkayî ke yewbîyayîşêko xurt virazê û na kêmanîyêka muhîm a. Gulcane vat ke ganî Rojawan ra heta Rojhelatî heme cinîyê kurdî zemînê têkoşînê hemparî de bêrê têhet û wexto ke yewbîyayîş bibo hem hemverê sîyasetê şerî de hem zî hêrişanê zîhnîyetê pederşahî de tepşêko xurt şêno bêro girewtene.

 

‘Ganî cinî serkêşî bigîrê xo ser’

 

Gulcane vat ke warê şerê Rojhelatê Mîyanênî de ganî cinîyê kurdî karê serkêşîya komelkîye bigîrê xo ser û destkewteyê kurdan tu cîyabîyayîşêk îdeolojîk dima ganî nêrê veradayene. Vat ke vengdayîşê 27ê sibate yê “Haştî û Komelê Demokratîkî” çar parçeyanê Kurdîstanî de do veng bido.

 

Kombîyayîşî de bi munasebetê 8ê adare zî ame vatene: “Ganî cinîyê yewbîyayîşî virazê. Ma bawer kenê ke her parçe parçeyanê bînan xurt keno. 8ê adare de ma ganî her ca ra felsefaya ‘Jin Jiyan Azadî’ berz bikerê. Ma hevalê Sakîne Cansiz û Hevrîn Xelefan ê. Bijî yewbîyayîşê cinîyanê kurdan!”

 

Hemsereka KNK’yî Zeynebe Murat mesajo bivîdeo şawit. 30 cinîyê ke rîyê şerê Îranî ra Başûrê Kurdîstanî ra nêeşkayî bêrê, mesajê înan zî ameyî wendene. Mesajê Yewbîyayîşê Cinîyanê Kurdanê Ewropa zî salone de ameyî parekerdene.

 

Kombîyayîş seba çapemenîye girewte dewam kerd.