WAN - Keyeyê tepişteya nêweşe Felem Aker qisey kerd û va: “Tepişteyê nêweşî ke rewşa înan giran a est ê. Feleme zî bi tena sereyê xo nêeşkena hewcedarîyê xo bîyaro ca. Ganî heme tepişteyê nêweşî lezkî bêrê veradayîş.”

 

Dimayê venga “Aştî û Cimatê Demokratîkî” ya Rayberê Şarê Kurdî Abdullah Ocalanî bala heme kesî şertê zîndanî ser o ya. Pêwa prosesê binpaykerdişê heqê ke zîndan de dewam keno. Goreyê dayeyê ÎHD’yî zîndan de 161 ci ra cinî bi temamî hezar û 412 tepişteyê nêweşî est ê. Yew nê tepişteya nêweşe Felem Aker ya 52 serrî ya ke zîndanê Tîpê Tyê Wanî de manena ya.

 

Di rey ameye tepiştiş

 

Felem Aker 14’ê tebaxa 2020ine de Şemzînan ê Colemêrgî de ameye tepiştiş. 6 aşmî tepişte menda û dimayê nê ameya veradayîş. Di serran ra dima 6 serrî û 3 aşmî ceza ci rê ameye birnayîş û şirawitî zîndanê Tîpa Tyê Wanî.

 

Nêweşîyê kronîkî yê astim, guatr û xeylêkê bînî est ê. Keyeyê Felem Aker qisey kerd û va nodulê guatrî pîl bîyo nê semedî ra ganî emelîyat bibo û va verê zî emelîyatê keseyê safrayî ameya kerdiş û enfeksyon girewta. Keye va, nê semedî ra zî Felem Aker nêwazena emelîyatê guatrî bikero.

 

Bêdermankerdiş temam bibo şirawitî zîndan

 

Mêrdeyê Felem Aker, Eşref Akerî va: “Kanûna 2024ine de zanîngeha Yuzuncu Yilî ya Wanî de emelîyatê safrayî bî. Labelê vera ke dermankerdiş temam bibo şirawitî zîndan. Kontrol nêame kerdiş, raporê lazimî nêameyî dayîş. Şertê zîndanî rîskê enfeksyonî zêde kerd. Dermankerdiş ame astengkerdiş. Selahîyetdaran tu çî nêkerd. Wexto ke safra ra emeliyat bî 12 rojan nêweşxane de mende. Dimayê nê şirawitî zîndan. Oksîjenê zîndanî kêmî yo. Doktoran va netîceya enfeksiyonî de nodulê Feleme pîş bîyê û se ra 45 emeliyat bi rîsk o. Nê semedî ra ma endîşe kenê. Semedê dermankerdişî şirawitî Tipa Edlî yê Stenbolî labelê eleqedar nêbîyî, rapor nêdayî. Dermankerdişê aye yeno astengkerdiş. Bi dermanan nika lingan ser o ya. Krîzê astimî aye est o.”

 

Eşref Aker wina dergî da: “Kênaya mi emeliyatê safrayî de verê cinîya mi de bî. Cinîya mi odeyêk goreyê tepişteyan ameya amadekirdiş de menda. Labelê goreyê şertê hîjyenî nêbî. Rewşa aye qet baş nêbî. Kênaya mi verê dayîka xo de mende. Destûr girewt û mende. Eger destûr nêameyîne dayîş do cinîya mi emeliyat nêbîne. Kênaya mi verê ci de nêbîne ma do vengê cinîya mi reyke bîn nêeşnawitêne.”

 

‘Tepişteyê nêweşê giranî est ê’

 

Keyeyê aye va dimayê emeliyatî hîrê aşmî hevalê koxuşê aye piştîdayîş dayê û hewcedarîyê aye ardê ca û va: “Tepişteyê nêweşî ke rewşa înan giran a est ê. Feleme zî tenya nêeşkena hewcedarîyê xo bîyaro ca. Zîndan de gumanê veremî est o. Pêwa testê Feleme negatîf bî zî verê hevalê ke karantîna de yê yena tepiştiş. Rewşa aye her çî giran kena. Hewte ra reyke 10 deqeyan ma bi pêvînayîşê telefonî rewşa aye musenê. Rewşa cinîya mi ma kena endîşe. Rewşa tepişteyan tesîr keyeyan ser o zî kena. Ma her hewte Colemêrgî ra yenê pêvînayîşê Feleme. No ma hetê ekonomî de zî zor dano. Waştişê ma oyo ke heme tepişteyê nêweşî bêrê veradayîş.”