MERKEZÊ XEBERAN - Ewro ablûqaya Kobanê kewte roja xo ya 30ine, roniştoxî venga akerdişê rayîran û resnayîşê hetkarîya merdimî semedê bajarî kerdî.

 

Komê Hukmatê Demkî yê Sûrîye 20ê çeleyî ra bajarê Kobanê ablûqa kerdê ke bîyo sebebê xirabîya rewşa zêdeyêrî 600 hezar sivîlanê bajarî û dewanê derûdorê ci.

 

Rayîrî girewte yê, îmkanî nînê dayîş ke xida û lazimîyê doktorî derbas bibê. Nêweşxane semedê kêmbîyayîşê dermanan, bi taybetî semedê nêweşîyê kronîk û rewşa awarte, bi îmkanê tewr kêmî xebitênê.

 

Şitê tutan hema hema çin o, cuyayîşê bi seyan pitikan tehluke de yo. Dewamkerdişê ablûqa do bibo sebebê zêdebîyayîşê dayeyê nêweşî û kêmwerdişî, bi taybetî mîyanê tutan û extiyaran de.

 

Ablûqa sewbîna bîya sebebê kêmbîyayîşê lazimîyê germkerdişî ke dejê roniştoxan, bi taybetî kamp û stargehan de, giranêr kerdo.

 

Roniştoxan waştişê akerdişê korîdorê merdimî kerdî ke xida, derman û sotemenî derbasê herême bibê û dîyar kerdî ke ablûqaya dewamkere binpaykerdişêk eşkera yê heqê merdimanê bingehînî yo.