MÊRSÎN – Gulay Koca dîyar kerd ke caardişê heqê hêvîye semedê awankerdişê aştîyêke mende lazimîyêke yo û va: “Naskerdişê heqê hêvîye semedê ameyoxê cimatêk demokratîk mecbûr o. Azadîya Rayberê Şarê Kurdî Birêz Abdullah Ocalanî rasterast bi awankerdişê demokrasîyê rastîn Tirkîya rê girêdaye yo.”

 

Endama Heyetê îdarekarîya Merkezî ya Partîya Herêmê Demokratîk (DBP) Gulay Koca derheqê babete de ajansê ma rê qisey kerd.

 

‘Şerê mîyanênî yê ke bi serran bidomîyayîne ame astengkerdiş’

 

Gulay Koca dîyar kerd ke Sûrîye de şerê kurd-ereb yê ke belkî bi serran bidomîyayîne, ame astengkerdiş û va: “Nê hêrişê ke 6ê Çeleyî de taxanê kurdan ê Helebê Sûrîye de dest pêkerdî û Rojawan de dewam kerdî, ganî sey hêrişêk cografyayêke nêrê dîyayene. Nê hêrişî hêrişêk sîstemê cuyayîşê demokratîk, ekolojîk û xelasîya cinîyan ser o bî ke serra 2014ine tepîya Rojawan de ameyo awankerdiş. Sewbîna, nê hêrişî hêrişêk awankerdişê modelêk neteweyê demokratîkî ser o bî ke bi temamî goreyê ruhê Rojhelatê Mîyanênî yo; awanîya ci yê zaf-nasnameyî, zaf-kulturî û zaf-dînî. Ganî wina bêro dîyayene.”

 

‘Piştîdayîşê hêrişan hemverê prosesê Tirkîya yo’

 

Gulay Koca da zanayîş ke her çiqas serrêke derbas bîyo, wextê ke proses bi Vengdayîşê “Aştî û Cimatê Demokratîk” yê Rayberê Şarê Kurdî Abdullah Ocalanî 27ê Sibate de dest pêkerd, êdî tu astengî çin o ke dewlete eştişê gamanê verbiçim dûr bikero. Tewrbîyayîşê Tirkîya pêrodayîşê Rojawanî de û desteştişê ci kombîyayîş, protestoyan û rayîrşîyayîşê ke armancê înan vindarnayîşê pêrodayîşê Rojawanî bî û hedefgirewtişê cinîyanê ke bi porê xo yê hetî piştîdayîş dayî cinîyanê Rojawanî, nakokîyêk eşkere bi prosesê Tirkîya dir pê ano. No bi temamî nîno qebûlkerdiş. Lazim o ke dewlete gamanê verbiçim bierzo. Kurdî reyke bîn heme çar perçeyê Kurdistanî bi zelalî dîyar kerdî ke ê hetgirê cuyayîşê pîya yê şara, dayîşêgirewtiş û dîyalogî yê û hetgirê aştîye yê.

 

‘Naskerdişê heqê hêvîyê semedê ameyoxê cimatêk demokratîkî lazim o’

 

Gulay Koca heqê hêvîyê di çarçeweyan de ercnayîş kerd û va: “Heqê hêvîyê tenya waştişêk qanûnî nîyo ke ser kesêkî yo. No lazimîyêk merdimî, wijdanî, exlaqî û sîyasî yo ke bi mîlyonan merdimê ke cezaya muebbetî yê girankerde ci rê ameyo birnayîş û bi rûmetê merdiman rê pênêkerdo û nîno peyser eştiş yan kêmkerdiş. Naskerdişê heqê hêvîye semedê ameyoxê cimatêk demokratîk lazimîyêke yo. Azadîya Rayberê Şarê Kurdî Birêz Abdullah Ocalanî, rasterast bi awankerdişê demokrasîyê rastîn Tirkîya rê girêdaye yo. Ma wazenê reyke bîn tîya qetî bikerê ke rêziknameyê qanûnî yê derheqê heqê hêvîyê de ganî bêereymendişî bêro bicaardiş.”

 

‘Azadîya Birêz Ocalanî xeylêk muhîm a’

 

Gulay Koca wina dewam kerd: “Awankerdişê aştîyêka mende, garantîkerdişê heqan bi hawayêk yasayî û bicaardişê rêziknameyê yasayî do hewldanêk demderg lazim bikero. Labelê, nêeşkayîşê nika yê caardişê şertê qerarê DMME’yî mojneno ke proses awankerdişê bingehêk yasayî dûr o. No yew semedê bêçalakîya dewlete bêbawerîya raya pêroyî kûrêr kerdo. Bêguman, no tesîrêk negatîf prosesî ser o keno. Na çarçeweya de, dewlete lazim o ke gamê verbiçim bierzo, tenya bi hawayêk vatişî nê. Qetîkerdişê azadîya Birêz Ocalanî, sere de çarçeweya heqê hêvîyê de û viraştişê pêkerdişê yasayî yê lazimî xeylêk muhîm o.”