AMED – Tîyatroyê Bajarî yê Şaredarîya Girdî ya Amedî (DBŞT), bi kayê xo yê newe yê semedê tutan ê bi nameyê “Hişê Min Tevlihev Bû” ÇandAmedî de vejîya vernîya temaşekeranê xo yê qijekan. No nawitişo taybet, wendekarê ke merkezê perwerdeyî yê Şaredarîya Peyasî wanenê û keyeyê înan ardî têhet.

 

Tutê Merkezê Perwerdeyî yê Xelîl Brahîn Oruc, Aydin Erdem û Mîr Celadet Elî Bedirxan ke binê îdareyê Mudirîya Kulturî û Karê Cimatî de kar kenê, beşdarî nê nawitişê tîyatroyî bîyî. Kay hetê Yasîn Yureklî ra ame nuştîş û rejîsorkerdiş; bi metodêk hemdem, bi hîkayeyî û teknîkê palyaçoyî yê bi westatî ameyê amadekerdiş, atmosferêk nepen awan keno û bala tutê 5 serrî û tewr pîl anceno xo ser.

 

Kayî de kaybaze sey Şahperî Alphan, Elvan Koçer, Omer Şahîn, Zeycan Ateş, Rêzan Kaya û Sena Ozbey ca gênê. Hîkayeya kayî raywanîya hewndar a tutêk taqîb keno; Tut serê sibayêk hewn ra şiyar beno û vîneno ke nêeşkeno keyeyê xo yan zî kesêk bîn rîyê erdî ser o bivîno. Nê raywanîya zereyîn de, bi hetkarîya toximêk çerxê cuyayîşê ke xoza de est o, newe ra vîneno û têkiliyê mîyanê cuyayîş, merdim û xoza de perspektîfêk bêmerdim-merkezî ceribneno.

 

Tut û keyeyê xo demê nawitişî de kêlîyê weş û yadkerdişî derbas kerdî. Selahîyetdarê şaredarî qetî kerdî ke ê do çalakîya kulturî û hunerî yê bi nê rengî ke wendekaran bi ziwanê dayîke dorê hunerî kom benê, bidominê.

 

Merkezê Perwerdeyî yê Şaredarîya Peyasî armanc kenê ke bi nê çalakîye manayîn, eşqê tîyatro zerrîya tutan de pîl bikerê û emrêk rew de îmkan bidê înan ke dinyaya hunerî dir têkiliyêk xurt awan bikerê