Elfazî Toral

 

STENBOL – Semedê krîzê merdimîye yê şer û pêrodayîşanê Rojawanî giran bîyê û destbendkerdişê tutan Tirkîye bêro rojeve Înîsiyatîfê Semedê Tutan Aştî ame awankerdiş. Endama Înîsîyatîfî Derya Bozarslan wina va: “Tutî bombebaranan de nê, vêşanî ra merdî. Her cayê ke heqê tutan yeno binpaykerdiş ma do qiseyê xo vajê. Semedê aştîyêka mende ma do têkoşînê xo bidominê.”

 

Hemverê tesîrê şer û pêrodayîşan ê tutan ser o 50 ra zêdeyêr pawitoxê heqê tutan, huqûqnas û psîkologî ameyî têhet û “Înîsiyatîfê Semedê Tutan Aştî” ame awankerdiş. Înîsiyatîfo ke rojeva înan ya ewilî krîzê merdimîye ya Rojawanî bîyarê rojeve yo, semedê pawitişê heqê tutan yê binê verasîya şerî de venga berpirsyarî û tevgêrayîşî rayapêroyî yê neteweyî û mîyanneteweyî keno.

 

Derya Bozarslan derheqê Înîsîyatîfê de qisey kerd. Derya Bozarslan da zanayîş ke ê sey komêke pawitoxê heqê merdiman 20-25 rojî verê ameyî têhet û semedê pawitişê heqê tutanê Rojawanî binê veresîya şerî de bêro rojeve, wazenê bala rayapêroyî yê neteweyî û mîyanneteweyî biancê babete ser. Derya Bozarslan wina va: “Ma hemine bi serran o wareyê heqê merdiman de xebitîyayê. Beşêk ma binê sazgehan de, beşêk zî şexsî çalakî domnayê. Înîsîyatîfê ma wayîrê 50 endamanê huqûqnas, pawitoxê heq, aktîvîst û psîkologan o. Armancê awankerdişê ma pawitişê heqê tutanê Rojawanî yo. Armancê ma yo bîn zî o yo ke tutê Tirkîya de yê çalakîya semedê Rojawanî de ameyê destbendkerdişî yê. Çi heyf no 15-20 rojî yo zaf tutî yenê destbendkerdiş û hûmara înan nîna zanayîş. Ma wazenê na babete bîyarê rojeve.”

 

‘Armancê ma binpaykerdişê heqanê Rojawanî bêro rojeve’

 

Derya Bozarslan wina dîyar kerd: “Tutî baş nînê dîyayene. Derheqê ke tutî çiqas ziyan vînenê de dayey û agahîyê somutî çin ê. No semedê Tirkîya zî derbas beno. Parlamentera DEM Partîye Gulîstan Koçyîgît eşkerayîya xo de dîyar kerd ke 500’yî ra zêdeyêr destbendkerdişî est ê. Labelê ma nêzanê nînan ra çend hebî tut ê. Ma zî wazenê bale biancê kêmasîyê dayeyan û nezelalîye ser. Mîyanê ma de avûkat û pawitoxê heqî est ê. Semedê nê yewîneyan hîna bi bandor bikerê; ma komîsyonê taqîbkerdişê heqê tutan, komîsyonê huqûqî, çapemenîye awan kerd. Armancê ma yê esas no yo ke ma binpaykerdişê heqê tutan yê binê şer û pêrodayîşan de yê vejê vernî.”

 

Koçberîya bi zore

 

Derya Bozarslan dewamê qiseykerdişê xo de wina va: “Eşkerayîya ma de ma vat, problem tenya bombebaran û çekî nîyê. Ablûqayo ke ameyo kerdiş de merdimî Rojawan de nêeşkenê xo biresnê hetkarîya merdimîye. Tutî serdan ra mirenê. Tewr tay qaso ke ma zanê 6 tutî serdan ra û bêdermanbîyayîşî ra dinyaya xo bedelnayî. Ma wazenê nê trajedîyî bîyarê rojeve. Waştişê ma yê esas akerdişê Berê Sînorî yê Murşîtpinarî yo. TIRê hetkarî Platformê Bajarî yê Amedî pawenê. Tutî uca tehlukeyêk girdî de yê. Ganî nê hetkarî lezkî biresê tutan. Armancê ma oyo ke aştî bêro caardiş. Nika adirbest est o labelê ganî ma nê binpaykerdişî rojeve de verdê. Xeylê keyeyî ancî rayîrê koçberîye de yê. Semedê tutê ke Tirkîya de ameyê destbendkerdişî zî ma xebata taqîbkerdişî domnenê. Ma Tora Tutan a Amedî dir mîyanê hemkarî de yê. Têkoşînê ma do bidomîyo.”