MERKEZÊ XEBERAN- KCK’yî derheqê peymana HSD û hukmatê demkî de eşkerayî daye û vat: “Rojava de peymanêk  ameya îmzakerdene labelê domdar a yan ney mîyanê wextî de zelal beno. Heta ke rewşa Rojava bi temamî zelal biba û heqê şarê Rojavayê Kurdîstanî bêrê garantîkerdene, ganî wayîrvejîyayîş bibo domdar.”

 

Hemserekîyê Konseyê Îdarekarî yê Koma Cimatê Kurdistanî (KCK) derheqê averşîyayîşê Rojawan-Sûriye û peymana mabêne Îdarekarîya Xoser-Hêzê Sûrîya Demokratîk (HSD) de ame neqlkerdiş, eşkerayîyêke nuşteyî vila kerd.

 

Eşkerayîya KCK’yî yê derheqê babete de wina ya:

 

“4ê çeleyî de mabênê heyetê Îdareyê Xoser û heyetê Şamî de kombîyayîş de pêameyîşo muhîm virazîya, Wezîrê Karanê Teberî yê Şamî mudaxeleyê kombîyayîşî kerd û kombîyayîş bêeşkerayî qedîya. 5ê çeleyî de Parîs de Amerîka, Fransa, HTŞ û Tirkîya peymane viraşte. 6ê çeleyî de zî taxanê kurdan ê Helebî ser o bi çekanê giranan hêriş ame kerdene. Komployê mîyanneteweyî ke amancê înan tasfîyekerdişê Îdareyê Xoserî yê Rojava bi, kewt meriyet.

 

QSD û şarê Kurdîstanê Rojava de vera HTŞ’yî ke dewleta tirkan piştî dana û çeteyê ke pîya hereket kenê, dest bi xoverdayîşî kerd. Hêrişkarî sînorê Rojavayê Kurdîstanî de ameyî vindarnayene. Nê xoverdayîşî kerd ke heme şarê Kurdîstanî û hêzê demokrasî sey xoverdayîşê Kobanî yê 2014î wirzîyê payan ser. Şarê kurdî her 4 parçeyanê Kurdîstanî de serra 2014î ra zêdeyêr girseyî û qerardar wirzayî payan ser.

 

‘Rayber Apoyî rolê xo kay kerd’

 

Rayber Apoyî verê 4ê çeleyî de çarçeweya entegrasyonê demokratîkî de projeyê çareserîye pêşkêşê Îdareyê Rojava kerd. Badê sabotekerdişê nê projeyê çareserîye zî Rayber Apoyî bi her rayîrî cehd kerd ke şer bi peymane biqedîyo, no cehdkerdişê ey tesîranê bînan reyde pêameyîşê 30ê çeleyî vet meydan.

 

‘Kurdan mojna ke miletêko demokratîk ê’

 

Her 4 parçeyanê Kurdîstanî de û Ewropa de şarê ma beşdarê seferberî bî ke Rojava de îlan bîye. Wirzayîşê şarê ma yê sey yewîye her ca de netîceyê raştîya şarî ya ke xoverdayîşê se serrî û şerê azadîye yê bi des serran viraşt. Şarê Vakur, Başûr û Rojhelatê Kurdîstanî û dinya heme pîya wirzîyayî û mojna ke kurdî miletêko demokratîk ê.

 

‘Ganî wayîrvejîyayîş domdar bo’

 

Rojava de adirbest û peymanêk virazîya. Labelê no adirbest û peymane do mende bê yan ney, mîyanê wextî de zelal beno. Na babete de ganî heme şarê ma û hêzê demokrasî tim hesas bê; heta ke rewşa Rojava bi temamî zelal biba û heqê şarê Rojavayê Kurdîstanî bêrê garantîkerdene ganî wayîrvejîyayîş her ca ra bibo domdar.”