Elfazî Toral

 

STENBOL – Endama Înîsiyatîfê Cinîyan a “Lazimîya Mi bi Aştîye Est a” Rojda Aksoy venga destekdayîşê hemverê krîzê merdimîye yê Rojawanê Kurdistanî kerd û qetî kerd ke xoverdayîşê cinî û şarê herêmî hemverê zihniyetê çeteyan semedê heme şaran muhîm o.

 

HTŞ’yî 6ê Çele de bi hêrişê Helebî dest pêkerd, Rojawanê Kurdistanî hedef girewt. Pêwa nê heme hêrişan ke raste rast bedenê cinîyan û îradeyê şarî hedef girewtî, xoverdayîş hem Rojawan û hem zî pêro Kurdistan û Ewropayî de dewam kerd. Netîceya xoverdayîşê xurtî yê erdî ser o, mîyanê Hêzê Sûrîye Demokratîk (QSD) û HTŞ’yî de peyman ameye îmzakerdiş.

 

‘Muhîm o ke lazimîyê lezgîn bêrê şawitiş’

 

Rojda Aksoy va: “Sey Înîsiyatîfê Cinîyan a ‘Lazimîya Mi bi Aştîye Est a’, ma şîyî Pirsûs. Ma tenya semedê piştîdayîşê cinî û merdimê ke Pirsûs de yê nêşî, labelê eynî demî de semedê ke înan rê bîyarê vîr ke ma têkoşînêk hempar de yê. 11 serrî verê, cinî zî şîyî Pirsûs; bi rastî, ma nika pîya rengêk cîya yê eynî rewşe ciwîyenê. Nika Rojawan de şerêko zaf cidî hemverê kurdan yeno domnayene. Ma zaf baş zanê ke heto bîn yê şerî çeteyê cîhadîst û barbar ê. Ma vînenê ke heme hêzê serdestî nika dorê ê kesê ke reyke înan ra vatêne ‘terorîst’ vindertê. Ma vînenê ke kurdan hemverê nê şerî de bi tena verdayî û heta ke hetkarîya ke do bişîyayîne înan asteng kenê, bi nê rengî şar kenê na rewşe. Hevalê ma zî eşkerayîya çapemenîye de behs kerdî, labelê zaf muhîm o ke lazimîyê lezgîn bêrê şawitiş. Cinîyan uca vatî ke nêeşkenê nan virazê her çiqqs ardê înan bî zî, semedo ke ne mazot û ne zî kolî estbî. Semedê tutan kevnik lazim o. Înan vatî ke dermanê înan zî çin o. Sey ke şima zanê, ê nêeşkenê germ bibê. Nika Rojawan de krîzêk zaf cidî est o.”

 

‘Ma bi zîhnîyetêk ke cinîyan peygoş kenê rî bi rî yê’

 

Rojda Aksoy bale ant problemê ke şarê Rojawanî ci dir rî bi rî mendî û sewîya krîzê merdimîye ya herêmî û va: “Ma Pirsûs û Kobanê cîya anê ziwan, labelê hevalê ma vatî ke şarê uca bi rastî yew şar o; ke ê merdim, heval û hemrayê yewbînan ê. Muhîm o ke no bêro qetîkerdiş. Sey cinîyê ke Stenbolî şî, ma uca bî ke semedo ke her kesî rê bîyarê vîr ke ma bi rastî beşê nê têkoşînî yê û ma kîşte kurdan û cinîyê kurdan de yê. Ewro, hem Tirkîya û hem zî dinya de, bi taybetî cinî lazim o ke nê têkoşînî de vengê xo berz bikerê. Semedo ke Rojawan de, cinî hemverê zihniyetêk ke cinîyan peygoş keno de şer kenê; no zaf muhîm o. Bi taybetî Tirkîya de faşîzm zaf zêde beno. Bi rastî cinî ganî bi hişmendîyêk dîyarkerde nêzdîyê nê çî bibê. Ganî hemverê pîlbîyayîşê nê faşîzmî vejîyê. Ganî xo vîr ra nêkerê ke yê ke uca şer kenê û yê ke hêrişê nê çeteyanê cîhadîstan dir rî bi rî manenê zî cinî yê.”

 

‘Ma do her çîyê ke destê ma ra bêro bikerê’

 

Rojda Aksoy tewr peynî wina va: “Sey cinîyê femînîst, ma her tim hetê aştî û têduştîye de bî; û ma do nika ra tepîya zî wina bidominê. Vernîya her çî, ma do her çîyê ke destê ma ra bêro ma do bikerê semedo ke qirkerdişê ke Rojawan de pê ameyî her cayî bêro zanayene. Sey cinî, ma çi tewir sîyasetê aştîye dominenê, ma aştîye ra çi fam kenê? Ma do her çîyê ke destê ma ra bêro bikerê semedo ke nê sîyasetî aver berê û mesajê ci vila bikerê.”