Gulistan Gulmuş 

 

RIHA - Cinîyê ke tewrê çalakîya şermezarkerdişê hêrişê Rojawanî yê Serêkanîye bîyî, reaksîyon vera bêvengîya dinya mojnayî û vengdayîşê, ‘Ma semedê Rojawanî tîya yê, peynîya nê zilmî bîyarê’ kerdî.

 

Hêrişê HTŞ û komê paramîlîterî yê girêdayeyê Tirkîya yê hemverê Rojawanî pêwa adirbestî her ke şinê zêde benê. Netîceya hêrişan de, mîyan de tutî zî est ê xeylêk kesî ameyî qetilkerdiş, xeylêk kesî birîndar bîyî. Pêwa nê herême de problemê derman, xida, awe û ceyranî dewam kenê. Pêwa nê negatîfîyan zî têkoşîn her ke şino gird beno. Hêrişî her ke şinê zêde benê û her herêmanê Kurdistanî de çalakîyê protestoyî dewam kenê. Pêwa zext û îşkenceyê polîsan, şar wareyan terk nêkeno û rayîrşîyayîşan pê anê.

 

Yew cayo ke çalakî pê yenê qezaya Serêkaniye ya xeta sînorê Kobanê de ya. Vizêrî Serêkaniye de pêwa ablûqayê polîsan şar ame têhet û çalakîya protestoyî pê ardî. Cinîyê ke tewrê çalakî bîyî waştişê xo ardî ziwan û venga selahîyetdaran kerdî.

 

‘Ma wazenê şer peynî bibo’

 

Hamîde Kiliç: “Ez semedê Rojawanî û Kobanê ameya tîya. Uca merdimî mîyanê serdî de teber de yê û ez semedê nê nêeşkena keyeyê xo de verê soba de roşî. Êdî wa no şer peynî bibo. Ez dayîka di şervanan a. Mi lajê xo Efrîn de vînî kerd, kênaya xo ra zî 12 serrî yo agahî nêgîna. Mi lajê xo vînî kerd, wa kes tutê xo vînî nêkero. Aştîye bi destê kamî ya wa bica bîyaro.”

 

‘Kobanê de bi rojano ceyran çin o’

 

Tuana Çetîn: “6ê Çeleyî ra şer est o. Merdimê bêguna mirenê, tutî mirenê. Pêwa adirbestî şer nêvindeno. Êdî bes o. Na babeta nîjadî ya, na babeta merdimîye ya. Wa êdî no şer vimdero. Ê tutî, ê merdimî guna yê. Kobanê bi rojano bêceyran, bêawe û bêderman o. Heyfê ê merdiman. Êdî vinderê.”

 

‘Kobanê de îşkence est o’

 

Cemîle Kilinç: “Ma semedê aştîye, wayê û biratîyê tîya yê. Wa merdimê ma, tutê ma nêrê qetilkerdiş. Ma şer nêwazenê. Ma aramîye wazenê. Ma do heta key nê biciwîyê. Ma hemverê şerî yê. Kobanê de îşkence est o. Birîndarî est ê. No bêhuqûqî yo.”

 

‘Ma semedê Rojawanî tîya yê’

 

Rahîme Bal: “Ma semedê Rojawanî tîya yê. Wa cinî nêrê qetilkerdiş. Pêwa adirbestî hêrişî dewam kenê. Tutî serdan ra û vêşanî ra dinyaya xo bedelnenê. Ma êdî aştîye wazenê.”

 

‘Wa peynîya nê zilmî bîyarê’

 

Gulçîn Kevcî: “Ma semedê Rojawanî ameyî têhet. Ma semedê tutan, semedê aştîye tîya yê. Heme tutê ma yê. Wa peynîya nê zilmê kurdan ser o bîyarê.”

 

‘Dinya çira bêveng a?’

 

Adîle Çelîk: “Ma ewro semedê Rojawanî ameya tîya. Çira her kes bêveng o. Bêhuqûqîyêk gird, nêheqîyekê girdî Rojawanî ser o est ê. Nê qedexeyî çira est ê. Çira rayîrşîyayîşê ma asteng kenê? Cayêk bîn çîyêk biqewîmîyo dinya veng vejena. Labelê semedê tîya çira kes çîyêk nêkeno. Adirbest est o labelê adirbest yeno binpaykerdiş. Wa peynî peynî nê şerî bîyarê.”

 

Zeynep Şahîn: “Ma ewro semedê Rojawanî tîya yê. Wa aştî bêro caardiş. Tutî serdan û vêşanî ra mirenê. Hêvîya ma aştîye ya. Wa adirbestêk bi bandor bêro caardiş. Ma serkewtişê Kobanê wazenê.”