Rozerîn Gultekîn-Buşra Turan

 

WAN – Pêwa 15 serrî erdlerzî ser o derbas bîyo zî semedê erdlerzeyan çareserî nêame dîyayene. Cinîyê ke konteyniran de manenê wina vatî: “Demê reyî yenê, AKP’yî ra bigî heta partîyan her kes yenê verê berê ma. Dimayê ci kes rewşa ma nêperseno.”

 

Wan de 23ê teşrîna verêne 2011ine de bi girdîya 7.2 erdlerz ame meydan û erdlerz de 604 merdimî dinyaya xo bedelnayî, 4 hezar û 152 kesî birîndar bî û bi hezaran kesî bêkeye mendî. Dimayê erdlerzî hîn cayan de konbajar û konteynirî ameyî awankerdiş. Labelê pêwa 15 serrî derbas bî zî hema problemî nêameyî çareserkerdiş. Bajarê konteynirî yê taxa Seyrantepe yê qezaya Tuşbayî de merdimî cuya xo binê şertê zehmetî de domnenê. Bajarê konteynirî 120 konteyniran ra pê yeno.

 

Welatijî keyeyê qijî, yê dilopan kenê û germ nêbenê de cuya xo domnenê. Cinîyê ke konteyniran de manenê derheqê zehmetîyanê ke ancenê de ajansê ma rê qisey kerdî.

 

‘Demê rayan yenê verê berê ma’

 

Ayşe Polat da zanayîş ke dimayê erdlerzî şîyê konteyniran û ca bîyê û va: “14 serrî yo ma cuya xo tîya de domnenê. Tu piştîdayîş ma rê nêame dayîş. Hetê ekonomî de ma zehmetî ancenê. Demê rayan AKP’yî ra bigî heta partîyanê bînan yenê verê berê ma û vanê ma do piştîdayîş bidê. Dima ra zî ma xo vîr ra kenê. Ma waştişname danê şaredarîya girde labelê tu piştîdayîş nîno dayîş. Ê ke torpîlê înan est ê piştîdayîş gênê. Bi serran o tu piştîdayîş nêame verê berê mi. Mi muracatê Îşkurî da labelê semedo ke dîplomaya min a sereyîne çin a mi nêgînê. Mêrdeyê mi nêweş o. Ma kaxidan kom kenê. Mêrdeyê mi seyafrotişî keno. Ma wina debara xo kenê. 3-4 aşmî reyke ancax 4 hezar TL pere yeno keyeyê mi.”

 

‘Kes nêvano şima merdî yan gane yê’

 

Ayşe Polat eşkera kerd ke bajarê konteyniran de 85 keyeyî est ê û her kes mexdurî ciwîyeno û wina dewam kerd: “Ma tîya de rewşêka nêbaş de ciwîyenê. Ma bi sobeya ceyranî zere germ kenê. Demo ke ceyran şino ma wina manenê. Awe kewena keyeyê ma. Mêsikî kewenê zere. 5 tutê mi est ê. Cayê tutanê mi çin o ke rakewê. Her 5 tutê mi zî şinê dibistane. Labelê ne werdêk înan ne zî cil û belgê înan est ê. Ma ardê xo zî bi deyn gênê. Ma nêeşkenê pereyê serwîsa dibistane yê tutan bidê. Nê semedî ra serwîsî vanê ma tutan nêbenê. Keyeyê ma awe kewena ci ma kartonan rafînenê. Ez tutanê xo bêwerd şirawena dibistane. Kes nêvano şima merdê yan mendê.”

 

Kamîle ya nêweşa kanserî: Ez 5 hezarî bidî çi?

 

Kamîle Alaş zî nê çî ard ziwan: “Ez nêweşa kanserî ya. 10 serrî yo tîya ya. Cuya zehmet û vay a. Semedê nêweşîya mi nê cayî qet baş nîyê. Mi zî waştêne cayêk bîn de biciwîyî labelê hêzê mi çin o. Ez bi meaşê teqawitî yê babîyê xo debare kena. 5 hezar gêna. Mêrdeyê mi wefat kerd. Tena ameyîşê mi no yo. Ez nê pereyî bidî çi? Semedê vewre rayîrê ma ameyê girewtiş. Ma wazenê vewra ma bêro pakkerdiş. Pêwa erdlerzî ser o serrî derbas bîyê çareserîyêk çin o.”

 

‘Dimayê qeyûman kesî ma nêdî’

 

Kader Erdogan zî dîyar kerd ke cuya înan bi varayîşê vewre ra hîna zehmet bîya û wina ard ziwan: “Semedê vewra verê berê ma nîna pakkerdiş, demo ke tutêk nêweş keweno ambûlanse nêeşkena bêro zere. Ganî semedê ma çareserîyêk bibo. Bi 11 serrî yo ma tîya yê. Her tim vanê ma awanîyan viraznenê. Labelê tu çîyêk çin o. Keyeyê ma qij ê. Ma mecburî tîya manenê. Merdim nêeşkeno tîya biciwîyo. Ma wazenê keyeyêko normal de biciwîyê. Sîwane dilopan kena. Ma heme nêweş kewenê. Demê weçînayîşan her tim yenê verê ma. Dimayê qeyûman tu çîyêk nêame kerdiş.”