Gulîstan Gulmuş

 

RIHA - Rojnamegare Ceklîn Brîmo neql kerd ke taxê Şêxmeqsûd û Eşrefîye pêro ameyî ablûqakerdiş, pêwa adirbestî zî hêrişî dewam kenê û va, “Demo ke adirbest ameyo neqlkerdiş ra pey, zafê reyî ame binpaykerdiş û hêrişî ameyî kerdiş. Leşkerê ke peyser game nêeştî, eynî demî de hûmara xo zî zêde kerdî. Ambargo 7 rojî yo dewam keno.”

 

22ê Kanûne de, komê çekdaran ê girêdayeyê Hukmatê Demkî yê Sûrîye taxê Şêxmeqsûd û Eşrefîye rê bi tank, roket û obusan hedef girewtî. Fedwa Mihemed El Kurdî (57) hêrişan de ameye qetilkerdiş û 19 sivîlê ke mîyanê înan de tut û cinî estbî, birîndar bî. 27ê Kanûne de, wendekarê zanîngehe rayîrê El-Siryan ser o eynî herême de ameyî remnayîş. Hêzê Asayîşê Zereyî yê taxa Şêxmeqsûd û Eşrefîye cewab dayî hêrişanê Hukmatê Demkî yê Sûrîye. Demo ke hêrişî dewam kerdêne, şaro ke Vakur û Rojhelatê Sûrîye de ciwîyayîne vecîyayî kuçeyan û eşkerayîyê piştîdayîşî semedê di taxan dayî. Netîceya nê rayîrşîyayîş û eşkerayîya piştîdayîşî de, adirbest ame neqlkerdiş. Pêwa adirbestî, hêrişî 7 rojî yo dewam kenê û taxî hema zî mîyanê ablûqa de yê. Zaf sivîlî keyeyê xo ra ameyî vetiş û taxî vuryayî meydanê şerî.

 

Rojnamegare Ceklîn Brîmo ke averşîyayîşê peyênan ê di taxan taqîb kena, JINNEWSî rê qisey kerd.

 

‘Hêzê asayîşî hewl danê taxan bipawê’

 

Ceklîn Brîmo dîyar kerd ke hêrişî pêwa adirbestî zî dewam kenê û va, “Dimayê hêrişê bi çekê giranan, tank û obusan taxe Şêxmeqsûd û Eşrefîye ser o, 19 sivîlî birîndar bî û cinîyêka 57 serre zî dinyaya xo bedelnaye. Dimayê hêrişanê ke 5 saetan dewam kerd, adirbest ame neqlkerdiş. Dima ra zî adirbest zaf rey ame binpaykerdiş û hêrişî dewam kenê.”

 

‘Hêzê asayîşî hewl danê taxan bipawê’

 

Ceklîn Brîmo dîyar kerd ke hêrişî pêwa adirbestî zî dewam kenê û va, “Dimayê hêrişê bi çekê giranan, tank û obusan taxanê Şêxmeqsûd û Eşrefîye ser o, 19 sivîlî birîndar bî û cinîyêka 57 serre zî dinyaya xo bedelnaye. Dimayê hêrişanê ke 5 saetan dewam kerd, adirbest ame neqlkerdiş labelê adirbest ame binpaykerdiş. Adirbest est o, labelê hêrişî dem bi dem dewam kenê. 25ê aşme de, hêzê çekdarî yê hukmatê demkî newe ra hêzê asayîşî yê nuqteya kontrolî ya ewro hedef girewtî. Hêzê asayîşî cewab nêdayîne. Hêzê asayîşî tena hewl danê ke nê di taxan bipawê. Eke ma rewşa ewroyîne biercnê, di taxî mîyanê ablûqayêk giran de yê.”

 

‘Sivîlî keyeyê xo ra ameyî vetiş, keyeyî vuryayî faqan’

 

Ceklîn Brîmo pare kerd ke pêwa adirbestî zî tank û çekê giranî taxan de ameyê bicakerdiş û va, “Dimayê ke adirbest ame neqlkerdiş, 7 rayîrî semedê di taxan ameyî akerdiş. Labelê hêrişê neweyî dir, pêro rayîrî newe ra ameyî padayîş. Nika, di taxî pêro ablûqakerde yê. Leşkeran tena peyserantişî red nêkerd, eynî demî de hûmara xo zêde kerd. Înan çekê giranan û tankan dorê taxe de bica kerdê. Sewbîna ê nêverdenê ke sivîlî biresê lazimîyê bingehîn yê sey weşîye û perwerdeyî. Di cayan de, bi taybetî kuçeyê Nedî El-Celeh û El-Siryan de, sivîlî keyeyê xo ra ameyê vetiş. Pêro nê keyeyî vuryayê faqan. Na rewşe bi zelalî îhtîmalê hêrişêko bîn mojneno.”

 

‘Di wendekarê zanîngehe ameyî remnayîş’

 

Ceklîn Brîmo wina peynîya qiseykerdişê xo ard: “Bi pêroyî, nê taxî ablûqakerde yê, û semedo ke zimistan o, merdimê uca zehmetîyan ancenê. Lazimîyê bingehînî nînê peydakerdiş û heta derman semedê nêweşan zî nîno dayîş. 27ê Kanûne de, di wendekarê zanîngehe rayîrê El-Siryan ser o ameyî remnayîş. Astengkerdiş 7 rojî yo dewam keno.”