Devrîm Findik

 

STENBOL - Cinîyan dîyar kerde ke ê serrêke bêşîdet wazenê û vatî, ganî 2026ine de dewlete hemverê şîdetê cinîyan ser o peynîya polîtîkaya bêcezakerdişî bîyaro.

 

Goreyê Anit Sayaçî 2025ine de 441 cinî hetê camêrdan ra ameyê qetilkerdiş. Waştişê cinîyan serrêke bêşîdet o û vatî, ganî dewlete peynîya polîtîkayanê bêcezakerdişî bîyaro. Cinî derheqê hêvîya xo ya serra 2026ine de qisey kerdî.

 

‘Ganî serra neweyî de kreşê bêpere bêrê akerdiş’

 

Mamosteya teqawide Salîha Nîsan da zanayîş ke şîdetê cinîyan ser her ke şino zêdeyêr beno û caardişê cezakerdişî kêmî yê. Salîha Nîsan wina qisey kerd: “Sîstem binê hegemonyaya sîstemê camêrdan de domneno. Ez Beşîktaş de ciwîyena û tersena. Ez her serre şêna teberê welatî. Ez uca xo asayîş hîs kena. Labelê Beşîktaş de tersena bi şewe vecîyî teber. Serra newî de ganî semedê dayîkan kreşê bêpere bêrê akerdiş. Ganî heqê cimatî semedê tutan bêro caardiş. Sektorê weşîye kêmî yo. Sîstemê randevuyî baş nîyo. No zî tesîrêko gird cimatî û cinîyan ser o keno.”

 

‘Ganî krîzê ekonomî bêro çareserkerdiş’

 

Merve Kurt dîyar kerd ke şîdetê cinîyan ser o roj bi roje zêde beno û meşrû beno û va: “Îktîdar cesaret dano gumanbaran. Zêdebîyayîşê şîdetê cinîyan de krîzê ekonomî tesîrdar o. Heta krîzê ekonomî kêm nêbo şîdet zî kêm nêbeno. Gumanbarî bi sebeban xo pawênê û hêrsê xo cinî û tutan ra vejenê. Ganî krîzê ekononî bêro çareserkerdiş. Serra newî de ma aramî, keyfweşî, aştî û edalet wazenê.”

 

‘Ganî cezayê bitesîr bêrê dayîş’

 

Sevda Paçaca zî dîyar kerd ke ê ke şîdet bica anê, dimayê tepiştişî bi efûyan yenê veradayene û cezayêka bi tesîr nîna birnayene. Sevda Paçaca wina va: “Ganî cînayetê cinîyan nêrê efûkerdiş. Ez serra newî ra çîyêk nêwazena. Her serre serra peyêne ra xirabêr a.”

 

‘Ganî sererastkerdişê neweyî bibê’

 

Arya Sozen zî eşkera kerd ke cinî kedêke gird danê û wina va: “Hemverê polîtîkayanê bêcezakerdişî bi sererastkerdişê neweyî ganî ceza bi tesîr bibê. Hemverê şîdetê cinîyan ser tu caardiş çin o. Gumanbarî yenê destbendkerdiş, berê bînî ra yenê veradayene. Pêwa qerarê dûrvistişî cînayet kenê. Ganî sererastkerdişêko qanûnî yê cidî bibo. Wa serra neweyî de şîdet biqedîyo.”

 

‘Ganî qanûnî bêrê caardiş’

 

Sanak Arslan zî wina ard ziwan: “Ganî cimat hemverê şîdetê cinîyan ser wayîrê hişmendîye bibo. Ganî her kes vengê xo berz bikero. Ganî ma yew bibê. Hemverê şîdetê cinîyan ser o ganî qanûnî bêrê rojeve. Ez nêwazena bi ters vecîyî teber.”

 

Cinîya bi nameyê Hamiyet ya ke nêwaşt peynameyê xo bido da zanayîş ke cinî hewl danê vengê xo bidê eşnawitiş labelê no veng nîno eşnawitiş û va, ganî hemverê şîdetî de tedbîrî bêrê girewtiş.