MERKEZÊ XEBERAN - Komîsyonê Cinîyan ê KNK’î bi eşkerayîyêke hêrişê hemverê Leyla Zana şermezar kerd û va: “Leyla Zana rûmetê şarê kurdî ya. Leyla Zana tena nîya!”

 

Nêrazîbîyayîşê hemverê hêrişê sîyasetmedara kurde Leyla Zana dewam kenê.

 

Komîsyonê Cinîyan ê Kongreya Neteweyî ya Kurdistanî (KNK) hemverê hêrişê cinsperest û lêşinê ke hemverê Leyla Zana eşkerayîyêka nuşteyî weşan kerd.

 

Komîsyonê Cinîyan ê KNK’î dîyar kerd ke hêrişê lêşinî ke hemverê îradeyê cinîyanê kurdan şexsê Leyla Zana de ame kerdiş, şermezar kenê û wina ame vatene: “Rojhelatê Mîyanên û Kurdistan de prosesêko kûr ê vurnayîşî dest pêkerdo. Ercnayîşê nê prosesî goreyê menfeetê pêroyî yê şar û cinîyan mumkin o; labelê semedê nê ganî îradeyêko faal, qerardar û awanker bibo. Eksê ci, polîtîkayanê hemverî û helwestê sabotajî do bibê sebebê netîceyanê zîyandar semedê şar û cinîyan.”

 

‘Leyla Zana rûmetê şarê kurdî ya’

 

Peynîya eşkerayîye de nê çî ameyî vatene: “Ewro ma vînenê, nê prosesê hesas û muhîmî de, hêzê tarî wazenê hemverê prosesî vecîyê ke Rayber Apo 27ê Sibate 2025ine de bi vengê ‘Aştî û Cimatê Demokratîk’ dest pêkerd, kêm bo zî hetê muhataban ra yeno dewamkerdiş. Nê hêzî her tim her çar parçeyanê Kurdistanî de faal ê û destkewtişê şarê kurdî hedefê înan o. Ewro zî armancê înan o yo ke bi zorberdişê nê prosesî, ameyoxê şaran newe ra tarî bikerê.

 

Ma sey Komîsyonê Cinîyan ê KNKî, Bursa de maçê Bursaspor û Somasporî de hêrişê lêşinî ke hemverê îradeyê cinîyanê kurdan şexsê Leyla Zana de ame kerdiş, bi giranî şermezar kenê û qebûl nêkenê. Stadyumê Bursasporî cayê şaran û pêra cuyayîşî yo; cayê nîjadperestî û hêrişanê lêşinan o nîyo. Nê semedî ra ganî Wezîrê Sporî mesûlîyetê xo bica bîyaro û kesê ke nê hêrişî kerdê ceza bikero.

 

Leyla Zana rûmetê şarê kurdî ya; Leyla Zana tena nîya!”