AMED - Cinîyê ke qezaya Licê ya Amedî ciwîyenê dîyar kerdî ke tiryak û fuhuşê ke ciwananê kurdan hedef gêno, parçeyêko polîtîkaya şerê taybetî yo û hemverê hêrişan venga têkoşînê rêxistinkerde kerdî.

 

Rojanê vîyarte de bi serkêşîya Têgêrayîşê Cinîyan ê Azadan (TJA) qezaya Licê ya Amedî de bi sloganê ‘Ma hemverê tiryak, fuhuş û polîtîkayanê şerê taybetî de rayîr ra şinê’ rayîrşîyayîş viraştî. Girseyo ke verê Fabrîqeya Halîs Toprakî de ameye têhet verê xo da merkezê qeza û rayîrşîyayîş kerdî. Zaf sazgeh, komele û merdimî tewrê rayîrşîyayîşî bîyî. Rayîrşîyayîşî de cinîyan bale ant rêxistinbîyayîşê hemverê polîtîkayanê şerî ser.

 

Şarê Licê ke hemverê hêrişan dest bi xebatan kerd, mesajê pîlkerdişê têkoşînî dayî.

 

‘Ma nê zilmî şermezar kenê’

 

Nazîme Boltan wina va: “Dewlete bi zanayîş polîtîkayanê lêşinan tutanê ma ser o domnena. Dewlete bi nê polîtîkayan zilm tutanê kurdan ser o kena. Prosesêko yeno domnayene labelê nê polîtîkayî proses ra peyser erzenê. Kurdî mesûlîyetê xo bica anê labelê dewleta tirkan nêana. Ma nê zilmî şermezar kenê.”

 

‘Wa nekewê faqa dewlete’

 

Guler Sevîltek dîyar kerd ke Licê de hetê dewlete ra polîtîkayê lêşinî yenê domnayene û wina dewam kerd: “Dewlete wazena îradeyê ma bişikino. Wa şarê Licê na hişmendî de bo, wa nêkewê faqa dewlete. Ez venga ciwananê Licê kena. Wa nêkewe faqa dewlete.”

 

Nedret Yildiz zî nê çî ardî ziwan: “Ma sey cinî hemverê tiryak û fuhuşî de têkoşîn bikerê. Verê dibistanan de tiryakî yeno rotiş. Wîcdanê înan senîn verdeno ke tutanê ma jehr kenê. Ganî her cayî de hemverê nê têkoşîn bêro kerdiş. Ganî dewlete hemverê nê gumanbaran ceza bido.”

 

‘Ma têkoşîn bikerê’

 

Emîne Al dîyar kerd ke Licê de ciwanî bi zanayîş hedef yenê girewtiş û wina eşkera kerd: “Wazenê şarê kurdî, ciwanan bênasname verdê. Ma Licê ya verêne wazenê. Ganî ma pêro têkoşîn bikerê. Êdî bes o.”

 

Cinîya ke nêwaşt nameyê xo bido va ke sebebê zêdebîyayîşê fuhuş û tiryakî polîtîkaya dewlete yo û va: “Vanê prosesêko aştîye est o. Madem wina çira nê polîtîkayanê lêşinan domnenê. Ma hemverê nê polîtîkayan têkoşîn bikerê.”