AMED - Îdarekarê 16 baroyan dîyar kerdî ke heqaretê ke maçê Bursaspor-Somasporî de Leyla Zana rê ameyî kerdiş qebûl nêbenê û waştî ke berpirsîyarî bêrê dîyarkerdiş û cezakerdiş.

 

Maçê Bursaspor-Somasporî de nengî û heqaretî Leyla Zana ya sîyasetmedara kurde rê ameyî kerdiş. Baroyê Semsûr, Agirî, Êlih, Çewlig, Bedlîs, Dêrsim, Amed, Îdir, Colemêrg, Qêrs, Mêrdîn, Mûş, Sêrt, Riha, Şirnex û Wanî derheqê nê nîngan û heqaretan de eşkerayîyêka nuşteyî da. Baroyan dîyar kerdî ke vatişê qijvistişî û cîyayî yê hemverê Leyla Zana nînê qebûlkerdiş û sey vatişê hemverê rûmetê merdimîye ercnayî.

 

Baroyan vatî ke ganî nengî û heqaretê ke ameyê kerdiş tena sey reaksîyonêko sporî û maçî nêrê dîyayene û vatî: “Nê nengî û heqaretan de, bîyayîşê cinî û kurdan cayê pêroyî de, heqê temsîlî û hemwelatîbîyayîşî hedef ameyê girewtiş. Ziwanê nefretî tena şexsan xirab nêkeno, eynî wextî de tesîrê xirab îradeyê cuyayîşî keno. Bi nê ziwanê nefretî û nê heqaretan, hemverê sîstemê cimatê demokratîk ê û prensîpê dewleta huqûqî ameyî binpaykerdiş.”

 

Baroyan waştî ke vatişê nefretî bêceza nêmanê nike bi no hawayî cîyekarî asan beno. Baroyan da zanayîş ke Qanûnê Hûmara 6222ine yê Derheqê Vernîgirewtişê Şîdet û Bêtertîbîyê Sporî de; tezahuratê heqaretî est ê, nengî, qijvistiş û hêrişê hemverê heqê şexsan qedexe keno. Baroyan waşt ke qeydê weşanê maçî, qeydê kamerayan û raporê federasyonî pêroyî bêrê cipersayîş û ceza û sankîsyonê lazimî lezkî bêrê dayîş. TFFî ra zî ame waştene ke disîplînê xo ca bîyaro û berpirsîyarê nê nengan û heqaretan bêrê cezakerdiş.