Derya Ren - Elfazî Toral

 

MERKEZÊ XEBERAN – Dayîka rojnamegere Cîhan Bîlgîn ke hevalê xo yê rojnameger Nazim Daştan dir ameye qetilkerdiş Katîbe Bîlgîn, dîyar kerd ke kênaya aye her tim rojnamegerîya aştîye kerda û va: “Kênaya mi semedê aştî têkoşîn domna.”

 

Rojnamegere Cîhan Bîlgîn 1996ine de qezaya Mîdyadî ya Mêrdînî de ameye dinya. Dibistana sereyîn, mîyanên û lîse uca de wend. Dima ra qeydê xo beşê Edaletî yê Zanîngeha Dîcleyî de viraşt. Serranê zanîngehe de kewte cigêrayîşê azadîye û 2014ine de vilakerdişê rojnameyanê Ozgur Gundem û Azadiya Welat kerde. Dimayê padayîşê Azadîya Welatî xebatanê xo hîna zêde aver fînena.

 

2017ine de verê xo da erdê ke Şorişê Cinîyan ê Rojawanî de yeno ciwîyayîş. Cîhan Bîlgîn Ajansê Xeberan ê Hawar (ANHA) de dest bi xebatan kena. Tewrê hamleyê Reqayî bena.

 

Cîhan Bîlgîn 2017ine de bi kameraya xo hovîtîya ke DAIŞî Reqayî de domna û xoverdayîşê YPJî yê hemverê çimsûrîyê DAIŞî dinya rê da şinawitiş. Cîhan Bîlgîn hêrişanê Tirkîye û komanê girêdayeyanê aye yê 2019ine hemverê Girê Spî û Serêkaniyê zî neql kerd.

 

Koçberîyê Tebqayî dinya rê da şinawitiş

 

Cîhan Bîlgîn, dimayê averşîyayîşê HTŞî yê Sûrîye ke Tirkîya û komê girêdayeyê aye nê sey firsend dîyayîne û 6ê kanûna 2024ine de hêrişê Kantonê Efrîn-Şehbayî kerd, koçberîyê şarî û hêrişan dinya rê da şinawitiş.

 

Xoverdayîşê Tişrînî

 

Cîhan Bîlgîn û Nazim Daştan 19ê kanûna 2024ine de demo ke xoverdayîşê Awbendê Tişrînî yê Vakur û Rojhelatê Sûrîye taqîb kerdêne, bi SÎHAyanê Tirkîye ameyî qetilkerdiş.

 

Dayîka Cîhan Bîlgîn Katîbe Bîlgîn derheqê kênaya xo de ajansê ma rê qisey kerde.

 

‘Rojnamegerîya aştîye kerdêne’

 

Katîbe Bîlgîn wina qal kerd: “Kênaya mi her tim aştî waştêne. Her rey ke mi gêrayîne vatêne ez derheqê aştîye de hewnan vînena. Ganî ma hewnanê aye ca bîyarê. Merdimêka hende hetê aştîye ya senîn yena qetilkerdiş? Ez tu dem kesanê ke kênaya mi qetil kerdî efû nêkena. Kênaya mi rojnamegere bî, rojnamegara aştîye bî. Çekê aye çin bî, qetil kerdî.”

 

‘Mi gorê aye nêdî’

 

Katîbe Bîlgîn dîyar kerd ke kênaya aye tu dem vîrê aye nêşona û nê tiştî va: “Kênaya mi zaf bi keyf û enerjîk bî. Hevalanê xo hes kerdêne. Cîhane şî kezeba mi parçe bî. Ez bimirî zî kênaya xo xo vîr ra nêkena. No dejêko gird o, derbas nêbeno. Destur nêda ma cenazeya aye bivînê. Mi gorê aye nêdî. Kênaya mi dişminî nêwaştêne. Merdişê kesî nêwaştêne. Semedê aştîye têkoşîn domna.”

 

‘Werrekna tutanê ma aştî bidîne’

 

Katîbe Bîlgîn wina peynî ard: “Cîhane qeydê aye yê beşê Edaletî yê Zanîngeha Dîcleyî de bî. Vernîya qetilkerdişê Cîhane, MÎTî aye ra persayêne û semedê nê venga babîyê aye dayîne. Zaf persayî, heta qetil kerdî. Ez semedê dayîkanê her di hetan sebr wazena. Werrekna tutanê ma aştî bidîne.”